Ўқитувчини қаматадиганлар таълим ҳомийсими?
Сурхондарё вилоят ҳокими Улуғбек Қосимов Маткабгача ва мактаб таълими вазири Ҳилола Умарова томонидан “Таълим ҳомийси” кўкрак нишони билан тақдирланди. Бу ҳақда вазирлик ахборот хизмати маълум қилди.
Унда қайд этилишича, вазир сурхондарёлик фахрий устозлар билан учрашган ва самарали фаолият юритаётган 6 нафар ўқитувчига “Халқ таълими аълочиси” кўкрак нишони ҳамда фаол ўқитувчилар, ўқувчилар ва уларнинг ота-оналарига ташаккурномалар топширган. Тақдирланганлар орасида, шунингдек, ҳоким Улуғбек Қосимов ҳам бор.
Аммо бундан нақд бир йил муқаддам, 2023 йилнинг июль ойида айнан Сурхондарё вилоят ҳокими Улуғбек Қосимов ўзи ўтказган мажлислардан бирида вилоятнинг Сариосиё туманидаги мактаблардан бирининг директори Умида Турсуновани бир оғиз гап билан қаматишга буйруқ берган эди.
Ўшанда собиқ директор ҳокимга милтиқ бўлса, отиб ташлашини, мактабда юзага келаётган вазиятлар уюштирилаётгани, вилоят ҳокимига нотўғри маълумот берилаётганини айтган.
“Милтиқ бўлса, отиб ташланг мени. Аввал бориб кўринг, мактабнинг нима муаммоси борлигини билинг. Ҳайф сиздай ҳокимга”,
деган эди директор.
Шундан сўнг ички ишлар органи ходимлари ҳоким буйруғи билан директорни залдан олиб чиқиб кетган. Аммо видео ижтимоий тармоқларда тарқалган куни Мактабгача ва мактаб таълими вазири (ўша пайтда Халқ таълими вазири) Ҳилола Умарова директор билан телефон орқали гаплашиб, унинг маъмурий қамоқ жазосини бекор қилдирганди.
«Сурхондарё вилояти Сариосиё туманидаги 28- мактаб директори билан боғлиқ вазиятни шахсан ўз назоратимга олдим. Мактаб директори айни дамда маъмурий қамоқ жазосидан озод этилди. Шу ўринда таълим соҳасида фаолият юритаётган ҳар бир шахс ўз муомала маданияти билан барчага ўрнак бўлиши лозимлигини эслатиб ўтмоқчиман»,
дея ёзганди вазир ўзининг Telegram саҳифасида.
Ҳоким бир оғиз гап билан қаматган, Ҳилола Умарова битта гап билан жазодан озод қилган мактаб директори кўп ўтмай лавозимидан озод қилинган. Судья эса қоғозда ҳаммасини ҳоким фойдасига «қунуний» тўғирлашга уринган.
Аммо ҳеч қандай суд ва терговларсиз директорни қаматишга буйруқ берган ҳоким ҳеч қандай жавобгарликка тортилмади ва ҳатто бугун шахсан Мактабгача қа мактаб таълими вазирининг қўлидан “Таълим ҳомийси” кўкрак нишонини олди.
Хўш, ўқитувчини қаматган ҳоким таълим ҳомийсими?