Бугун, 29 март Тошкент ҳавоси ифлосланишининг олдини олиш мақсадида “Автомобилсиз кун” эълон қилинган ва кўплаб фуқаролар, амалдорлар ўз ишларига машинасиз етиб келди. Аммо Тошкент шаҳар ҳокимлиги ходимларининг ўзи “Автомобилсиз кун”да ҳам ўз машиналаридан воз кечмади.
Uzdiplamat.uz бугун, 29 март куни эрта тонгдан Тошкент шаҳар ҳокимлиги биноси олдида туриб, масъулларнинг Президент Фармонига қай даражада риоя қилаётганини кузатди.
Кузатувга кўра, ҳудуддаги автотураргоҳда машиналар кам. Аммо шу билан бирга ҳокимлик дарвозасидан кириб кетаётган автомобилларнинг ҳам кети узилмади.
Ҳолатга аниқлик киритиш мақсадида Тошкент шаҳар ҳокимлиги Матбуот хизмати раҳбари Гулноза Қосимовадан интервью олдик.
“Биз “Автомобилсиз кун” тадбирини тўлиқ қўллаб-қувватлаймиз. Бугун шаҳар ҳокимлиги ходимлари, туман ҳокимлиги ходимлари имкон қадар машинасиз ишхонага қeлди. Шу билан бирга нафақат машинасиз келишган, хатто, автобус, метро ва экологик тоза машиналарда келишга ҳаракат қилишди”, – деди у.
Ундан ҳокимлик дарвозасидан кириб кетаётган автомобиллар ҳақида сўралганда эса у “булар чет элликларга тегишли”, дея жавоб қайтарди.
Хўш, Тошкент ҳавоси учун барча давлат органлари, фуқаролар курашаётган бир пайтда нега Тошкент шаҳар ҳокимлигининг ўзи курашмаяпти?
Маълумот учун, бугун 29 мартни Тошкентда “Автомобилсиз кун” этиб белгилаш Президентининг 2024 йил 21 февралдаги “Ўзбекистон – 2030 стратегиясини“ Ёшлар ва бизнесни қўллаб-қувватлаш йили”да амалга оширишга оид давлат дастури тўғрисида”ги 37-сон Фармонида назарга тутилган эди.