Хусусий бандлик агентликларига ишга жойлаштириш бўйича хизмат кўрсатганлик учун ҳақ ундиришга рухсат берилади. Бу ҳақда Президент фармонида маълум қилинди.
Унга кўра, жорий йилнинг 1 июлидан бошлаб, хорижда меҳнат фаолиятини амалга ошириш истагида бўлган шахсларга чет элда ишга жойлаштириш бўйича хизматлар кўрсатганлик учун ҳақ ундиришга рухсат берилади.
Бунда хорижда меҳнат фаолиятини амалга ошириш истагида бўлган фуқаролар томонидан тўланадиган маблағлар тижорат банкларида очилган махсус ҳисобварақада сақланади.
Шунингдек, махсус ҳисобварақада сақланган маблағлар хусусий бандлик агентлиги томонидан шартнома мажбуриятлари тўлиқ бажарилганидан сўнг хусусий бандлик агентлигининг асосий ҳисоб-варағига ўтказилиши белгиланган.
Бундан ташқари, мамлакатнинг дипломатик ваколатхоналари ва консуллик муассасалари ходимлари учун белгиланган пенсияни ҳисоблаб чиқариш, вояга етмаган фарзандларининг умумтаълим муассасаларида таҳсил олиши билан боғлиқ тўловларни қоплаб бериш ҳамда уларга моддий ёрдам кўрсатиш ва рағбатлантириш тартиби Камбағалликни қисқартириш ва бандлик вазирлиги ҳузуридаги Ташқи меҳнат миграцияси агентлигининг хориждаги ваколатхоналари ходимлари ва вакилларига нисбатан ҳам татбиқ этилади.