Энг катта сув тақчилиги Ўзбекистонда кутилмоқда.
Марказий Осиё аҳолисининг 14 фоизи, яъни 10 миллион нафарига тоза ичимлик суви етишмайди. Бу ҳақда Евроосиё тараққиёт банки (ЕТБ) томонидан чоп этилган «Марказий Осиёда ичимлик суви таъминоти ва канализация» номли мақолада маълум қилинди.
Қайд этилишича, 1994 йилдан 2020 йилгача Марказий Осиё давлатларида ичимлик сувидан фойдаланиш ҳажми икки баравар кўпайиб, 8,6 км3 га етган. Бироқ унинг таъминот инфратузилмасига киритилган сармоя истеъмол ўсишига мос келмаган.
«Ҳисоб-китобларга кўра, ҳудуддаги сув ва канализация ускуналарининг 80 фоизга яқини талабга жавоб бермайди. Бундан ташқари, тарқатиш тармоқларидаги сув йўқотишлари 55% гача бўлиши мумкин»,
дейилади хабарда.
Шунингдек, мақолада Марказий Осиё томонидан секторни ривожлантириш бўйича қабул қилинган режалар учун молиявий ёрдам аниқ йўқлиги билдирилган. Бунинг оқибатида эса ичимлик суви таъминоти учун 2025-2030 йиллар оралиғида 12 миллиард доллардан ортиқ ёки йилига 2 миллиард доллар атрофида пул кераклиги айтилган.
«Энг катта сув тақчилиги Ўзбекистонда кутилмоқда. Бу мамлакатда йилига 826 миллион доллар ёки 2025–2030 йиллар оралиғида сув учун деярли 5 миллиард доллар етишмаслигини англатади. Қозоғистон учун ҳам йилига 700 миллион доллар ёки 2025–2030 йилларда 4,2 миллиард доллар миқдорида катта танқислик юзага келиши прогноз қилинган. Бу ҳолат Тожикистонда ҳам мамлакат иқтисодиёти ҳажмини ҳисобга олган ҳолда сезиларли даражада сув миқдори камайиши айтилган. Жумладан, бу йилига 209 миллион долларни ташкил этади ёки 2025–30 йилларда 1,2 миллиард доллардан ошади»,
дейилади хабарда
Маълумот учун, олдинроқ Ўзбекистон 2030 йилга бориб сув танқис бўлган 33 та давлат қаторига тушиб қолиши мумкинлиги прогноз қилинган эди.
Эслатиб ўтамиз, Сув хўжалиги вазири ҳам яқин йилларда Ўзбекистонда сув танқислиги кузатилиб, ҳосилдорлик тушиб кетиши, озиқ-овқат махсулотлари нархи бир неча баробар ошиб кетиши мумкинлигини айтган эди.