Россия ташқи ишлар вазири Сергей Лавров 7 октябрь куни Москвада МДҲ ташқи ишлар вазирлари кенгаши йиғилишида санкцияларга қарши ҳужжат имзоланганини айтган.
Унинг сўзларига кўра, «икки мустақил давлат бир-бири билан қандай муносабатлар қуришини кимгадир ёқмаган ҳолда қўлланиладиган иккинчи, учинчи даражали санкциялар ноқонуний бўлиб, халқаро ҳуқуқ билан ҳеч қандай умумийликка эга эмас».
«Бизнинг стратегик ҳамкорларимиз ва иттифоқдошларимиз билан савдо-иқтисодий алоқаларимизни нафақат сақлаб қолиш, балки уларни кенгайтиришга қаратилган барча қадамларимиз халқаро ҳуқуқ нормаларига тўлиқ мувофиқ келади, бу эса адолатли рақобат, бозор механизмлари ва мулк дахлсизлиги ҳақида гапиради», – деди С. Лавров.
Лавров МДҲ давлатлари ҳақида гапирар экан ташқи санкцияларга қарши “ўз ҳужжатларимизни имзоладик”, дея хитоб қилган “Биз ўз ҳужжатларимизни, ташқи сиёсат раҳбарлари ҳужжатларини қабул қилдик. Улар орасида бир томонлама мажбурий чоралар, яъни санкцияларнинг қабул қилинмаслиги тўғрисидаги ҳужжат, Евроосиё хавфсизлик тизимини шакллантириш асосий параметрларини белгиловчи ҳужжат ва жисмоний тарбия ва спорт соҳасидаги ҳамкорлик тўғрисидаги ҳужжатни алоҳида таъкидлаб ўтмоқчиман”, деб айтган Лавров.
Шунингдек, Россия ташқи ишлар вазири Сергей Лавров йиғилишда Евроосиёда кўп қутбли дунё маркази шаклланаётганини таъкидлаган. У яна минтақада Россия, Хитой ва Ҳиндистоннинг ўрни алоҳида эканлигига урғу берган.
Санкциялар қандай ҳуқуқий асосга эга?
Санкцияларни тўғридан-тўғри бир давлат ёки бир неча давлатлар гуруҳи (масалан, АҚШ, Европа Иттифоқи ёки БМТ) аниқ бир мамлакат ёки субъектга нисбатан қўллайди. Бу санкциялар, санкция қўллаган мамлакат фуқаролари ва компанияларига мўлжалланган бўлиб, уларга белгиланган фаолиятларни амалга оширишни тақиқлайди. БМТ Хавфсизлик Кенгаши халқаро тинчлик ва хавфсизликни сақлаш вазифаси доирасида санкцияларни қўллаши мумкин. Бу санкциялар халқаро ҳуқуқда легитим ҳисобланади, чунки улар бутун дунё тан олган орган томонидан тасдиқланган. ЖСТ одатда савдони чеклашни тавсия қилмайди, лекин миллий хавфсизликни муҳофаза қилиш ёки БМТ талабларини қондириш мақсадида санкцияларни қўллашга рухсат беради. Иккиламчи санкциялар тўғридан-тўғри можаро ёки низога алоқадор бўлмаган давлатлар ёки субъектларга таъсир қилиши мумкин бўлгани учун иттифоқчилар ва савдо шериклари билан низолар келтириб чиқаради.