Туркия Ташқи ишлар вазири Хоқон Фидан Туркий Давлатлар Ташкилоти минтақавий ҳамкорлигини кучайтириш учун туркий давлатлар орасида ягона алифбони яратишга чақирди. Бу ҳақда “Hurriyet.com” нашри хабар берди.
«Глобал кучлар рақобати географиямизга кириб кетишига йўл қўймаслик учун сафларимизни кучайтиришимиз ва имкониятларимизни умумий фаровонлигимиз йўлида ишлатишимиз керак. Биз имкон қадар тезроқ алифбо бирлигини ўрнатишимиз керак»,
деган Туркия Ташқи ишлар вазири Хоқон Фидан.
Вазир Туркия, Озарбайжон ва Ўзбекистон лотин алифбосидан фойдаланса, Қозоғистон ва Қирғизистон кирилл; ёзувидан фойдаланишда давом этаётганига алоҳида тўхталган.
Вазир ушбу ТДТ доирасида ягона алифбони яратиш бўйича саъй-ҳаракатларни қўллаб-қувватлаш учун ташкилот доирасидаги давлатларни мустаҳкам институционал асос яратишга чақирган.
«Биз алоқа, энергетика, молия, савдо, мудофаа саноати ва янги технологиялар каби соҳалардаги ҳамкорлигимизни янада ривожлантириш учун зарурий келишув асосларини яратишимиз керак»,
дея қўшимча қилган у.
Шунингдек, у дунёнинг турли бурчакларидаги туркий фуқароларни Болқон, Шарқий Европа, Яқин Шарқ ва Ўрта Шарқда яшовчи ватандошларимизни ҳимоя қилишни кун тартибига чиқаришимиз лозимлигини айтган.
Фидан ТДТ ташкилот доирасини кенгайтириш учун Турк Кипр, Венгрия ва Туркманистон кузатувчи мақомга эгалигини алоҳида айтиб ўтган. У Европа Иттифоқи томонидан тан олинган Кипр юнон маъмуриятидан фарқли ўлароқ, оролнинг фақат туркий фуқаролар яшайдиган қисми билан тўғридан тўғри алоқа қилишга чақирган.
«Барча биродарларимизни Кипр турк халқини Турк дунёсининг ажралмас бир қисми сифатида ўзига хос ҳуқуқларини қайта тиклаш учун қўллаб-қувватлашга чақирамиз. Шу нуқтаи назардан, биродарларимиз ўн йиллар давомида дучор бўлган ноҳақ ва ғайриинсоний изоляцияни тугатиш учун Турк Кипр билан савдо алоқаларимизни оширишга чақираман»,
деган у.
Вазир, шунингдек, Озарбайжон ва Арманистон ўртасидаги нормализация жараёнига тўхталиб, тезда тинчлик битимига умид билдирган.
«Биз, айниқса, Озарбайжоннинг келишувни тузишга бўлган қатъий содиқлигини ва ижобий ёндашувини юқори баҳолаймиз»,
деган Туркия Ташқи ишлар вазири.
У шунингдек, апрель ойида Озарбайжон президенти Илҳом Алиев Арманистон билан тинчлик келишуви ҳар қачонгидан ҳам яқинроқ эканини, икки мамлакат чегараларни белгилаш устида узоқ вақтдан бери давом этиб келаётган келишмовчиликларни ҳал қилиш устида ишлаётганини айтган.
Эслатиб ўтамиз, аввалроқ Туркия мактаб дарсликларида Марказий Осиё атамасидан воз кечиб, ўрнига Туркистон атамасини жорий этмоқчи.