“Миллий тикланиш” Демократик Партияси етакчиси Алишер Қодиров эндиликда Ўзбекистонда энергия ишлаб чиқариш ва сотишда монопол мавқе бўлмаслигини маълум қилди.
Унинг айтишича, Ўзбекистон энергетика соҳасига жиддий ўзгаришлар олиб кирадиган “Энергетика тўғрисида”ги қонун лойиҳаси партия фракциясининг 8 июлдаги навбатдаги йиғилишида иккинчи ўқишда маъқулланган.
“Мобил алоқада хизмат кўрсатадиган компанияни танлаганингиздек энергия сотадиган компанияни ҳам танлаш ҳуқуқингиз бўлади. Энергия ишлаб чиқарувчи ва сотувчи компаниялар орасида рақобат бўлади. Амалдаги қонунда бу тақиқланган эди”,
дейди Алишер Қодиров.
Шунга биноан, электр энергиясини ишлаб чиқариш, узатиш, тақсимлаш, сақлаш, электр энергияси билан таъминлаш, марказий харидорнинг функцияларини бажариш, электр энергияси савдоси, импорти ва экспорти лицензия асосида амалга оширилади.
Қолаверса, қонун лойиҳаси билан энергетика бозори иштирокчиларининг мақоми, ҳуқуқлари, мажбуриятлари ва жавобгарлиги белгиланмоқда. Унда электр энергияси бозорини ташкил этишга оид қоидалар, электр энергетикаси соҳасида тарифларни шаффоф тамойиллар асосида шакллантириш тартиблари ҳам назарда тутилмоқда.
Алишер Қодиров бундан бир неча йил аввал автосаноатда монополия тугамаса, автомашина нархлари ўзгармаганидек, энергетикада ҳам монополия тугамаса, нархлар ўзгармаса, аҳолини газ ва электр билан таъминлашда сифат ўзгармаслигини айтганди.
“2022—2026 йилларга мўлжалланган Янги Ўзбекистоннинг тараққиёт стратегияси тўғрисида”ги президент фармонида электр энергияси таъминотида монополия бекор қилиниши ва соҳага бозор механизмлари жорий этилиши белгиланганди. Унда “Ўзбекистон миллий электр тармоқлари” АЖдан электр энергиясини “ягона харид қилувчи” функциясини ажратиш, “Ҳудудий электр тармоқлари” АЖга хусусий операторларни жалб қилиш бўйича асосий талабларни белгилаш, “Ўзбекгидроэнерго” АЖ кичик ва ўрта инвестиция лойиҳаларига хусусий инвесторларни жалб этиш мақсад қилинганди.
Маълумот учун, «Ҳудудгазтаъминот» акциядорлик жамияти бутун республика бўйлаб аҳолини электр энергияси билан таъминловчи ягона ташкилот бўлиб, ҳар бир туман, шаҳар ва вилоятда жами 206 та газ таъминоти ташкилотлари мавжуд.