Маданият вазири Озодбек Назарбеков кеча, 11 март куни АОКАда бўлиб ўтган матбуот анжуманида Uzdiplomat.uz’нинг россиялик хонандаларнинг Ўзбекистонда концерт бериши сўнгги йилларда қанчага кўпайгани ҳақидаги саволига жавоб берди.
Унинг айтишича, хорижликларнинг концерти тадбиркорлар томонидан ташкил этилади.
“Чет эл қўшиқчиларининг Ўзбекистонда бўладиган концертларига Маданият вазирлигининг алоқаси йўқ, бу хусусий тадбиркорлар томонидан ташкиллаштирилади. Пойтахтда концерт беришни истаган хорижлик қўшиқчилар тўғрисида вазирликда статистика юритилмайди.
Биз ҳам худди сиздек қайси хонанда қачон ва қаерда концерт беришини рекламалар орқали кўриб биламиз. Сабаби концертни биз эмас, тадбиркор ташкил этади. Хусусий тадбиркорларда ҳозир чет элдан хонандалар олиб келиш, рухсат олиш ва концерт ташкиллаштириш имконияти бор. Вазирлик бошқа давлат ижодкорларини халқаро фестиваллар ёки маданият кунларига таклиф қилади холос. Лекин тижорат мақсадида амалга оширилаётган концертлар тадбиркорлар томонидан қилинади», — деди вазир.
Шунингдек, у нафақат россиялик, балки бошқа давлат санъаткорлари ҳам тадбиркорлар орқали Тошкентга бемалол келиб, концерт бериб кетишлари мумкинлигини айтди.
“Бугунги кунда Россия санъаткорлари учун дунёда майдонлар қисқариб кетди. Табиийки улар ҳозир ўзлари учун бўш майдон, яъни қаергадир бориш имкони бўлган ёки аҳоли қабул қиладиган майдонларни қидиришга маҳкум. Россиялик санъаткорлар тадбиркорлар орқали [Ўзбекистонга ҳам] келиб, бемалол концерт бериб кетишлари мумкин. Нафақат Россия, балки бошқа мамлакатлар санъаткорлари ҳам”, — деди Маданият вазири.