Бунда машҳур стабилкоин эмитенти Tether компанияси Ўзбекистоннинг рақамли валютасини ишлаб чиқишга кўмаклашади. Компания Ўзбекистон билан блокчейнга асосланган P2P телекоммуникация инфратузилмасини ривожлантириш бўйича меморандум имзолади.
Бу ҳақда компания ўз расмий саҳифасига 7 март куни жойлаган пресс-релизида маълум қилган.
Унда ёзилишича, Tether республикани «peer to peer» ва блокчейн технологиялари учун марказий марказ сифатида жойлаштириш мақсадида Ўзбекистон истиқболли лойиҳалар миллий агентлиги билан ўзаро англашув меморандуми имзолаган.
“Ҳамкорлик Ўзбекистон ҳудудида блокчейн технологияси, жумладан, стабилкоинларни ишлаб чиқиш ва жорий этиш ҳамда рақамли активларни токенизация қилишни ўрганиш ва рағбатлантиришга қаратилган. Ташаббус минтақада иқтисодий ўсишни ва инновацияларни рағбатлантиришга қаратилган”, – дейилган хабарда.
Ҳамкорликнинг аниқ тафсилотлари ошкор этилмаган бўлса-да, Tether Ўзбекистонда криптоактивлар учун қонунчилик базаси ва тартибга солиш сиёсатини шакллантиришда ёрдам беришини маълум қилди.
Бундан ташқари, ҳамкорлик Ўзбекистоннинг рақамли валютасини ишлаб чиқиш ва жорий этишга кўмаклашишга қаратилган.
“Биз Ўзбекистон истиқболли лойиҳалар миллий агентлиги билан Ўзбекистонда блокчейн, стабилкоинлар ва “пеер-то-пеер” телекоммуникация технологияларининг кенг имкониятларини ўрганиш учун ҳамкорлик қилишдан хурсандмиз.
Ушбу ҳамкорлик Tether’нинг глобал миқёсда инновациялар ва рақамли активлар экотизимининг масъулиятли ривожланишини қўллаб-қувватлашга содиқлигини кўрсатади”, деди Tether бош директори Паоло Ардоино.
Эслатиб ўтамиз, Ўзбекистонда криптовалюталарни сотиш фақат Ўзбекистон истиқболли лойиҳалар миллий агентлиги томонидан лицензияланган, савдо серверлари Ўзбекистон ҳудудида жойлашган бўлиши керак бўлган ихтисослашган криптобиржалар билан чекланган.