Ўзбекистонда энг арзон ресурс бу – сув! — Акмал Муродов.
Ўзбекистонда аҳоли учун электр энергиясига қўлланилган 200 кВт/соатлик “ижтимоий норма” ичимлик суви учун қўлланилмайди. Бу ҳақда бугун, 9 июнь куни ахборот ва оммавий коммуникациялар агентлигида бўлиб ўтган матбуот анжумани давомида “Ўзсувтаъминот” АЖ бошқаруви раиси ўринбосари Хуршид Раҳматуллаев маълум қилди.
“Сув бу ҳаётий эҳтиёж. Уни чеклашга, ёки қандайдир лимит қўйишга ҳозирча ҳеч кимнинг хаққи йўқ. Масъул шахс сифатида шуни айта оламанки, лимит бўйича ҳозирча (!) ҳеч қандай режа йўқ”,
деди у.
Маълум бўлишича, Қозоғистонда келгуси йилдан бошлаб “қанча кўп истеъмол қилинса, шунча кўп тўлаш” тамойилига асосланган тўрт даражали таъриф жорий этилади.
Унга кўра, бу тизим фақат сувни меъёрдан ортиқ сарфлайдиганларгагина таъсир қилади.
“Қозоғистонда жорий этилаётган янги тизим аслида бутун дунёда бор. Лекин бизнинг ҳозирча бундай табақалаштирилган тўлов ҳақида режаларимиз йўқ. Ўзбекистонда сув ҳисоблагичлар билан таъминланганлик даражаси 87% га етди. Аммо агар бу 100 % га етган тақдирда ҳам сув захираси нуқтаи назаридан ҳам яқин келажакда аҳоли учун лимит ўрнатиш режамиз йўқ»,
деди Раҳматуллаев.
“Ўзсувтаъминот” АЖ раиси ўринбосарининг очиқлашича, ҳар бир ўзбекистонлик кунига 200 литр сув ишлатади.
Бу эса бoшқа мамлакатларда 80-100 литрни ташкил қилади. Шунга кўра, агар ўзбекистонликлар сувни тежамаса энг охирги чора — иқтисодий ричаг билан таъсир қилиш қолади.
“Бунлай ҳолда ягона чора иқтисодий ричаг — таърифларни ошириш бўлиб қолади. Шунинг учун фуқаролар ичимлик сувини тежаши керак”,
деди раис ўринбосари.
“Ўзсувтаъминот” АЖ Матбуот котиби Акмал Муродов эса Ўзбекистонда энг арзон ресурс — сув эканини айтмоқда.