Ўзбекистонда криптофаолиятга рухсат этилган 2022 йилдан то бугунги кунгача 44 миллиард сўм давлат бюджетига тушум қилинган. Бу ҳақда бугун, 24 май куни АОКАда бўлиб ўтган матбуот анжуманида Истиқболли лойиҳалар миллий агентлиги бошқарма бошлиғи Асқаржон Зокиров маълум қилди.
![](https://uzdiplomat.uz/wp-content/uploads/2024/05/photo-2024-05-24-19-15-56.jpg)
“Бу мазкур соҳанинг Ўзбекистон иқтисодиётига қўшаётган ҳиссасидир. Яъни 2024 йилнинг 20 июнидан бошлаб крипто-биржа ва крипто-дўкон ортидан давлат бюджетига тушадиган пуллар миқдори оширилмоқда. Бунда келиб тушадиган тушумнинг 80 фоизи давлат бюджетига тўғридан-тўғри ўтади”,
деди у.
Унинг айтишича, 2022 йилнинг охирига келиб деярли учта – крипто-биржа, крипто-депозитлар ва крипто-дўкон бўйича тегишли норматив-ҳуқуқий ҳужжатлар имзоланиб, кучга кирган. Президентнинг 2018 йил 3 июлдаги қарорига биноан эса 2023 йилнинг 1 январидан бошлаб барча фуқаролар Ўзбекистон ҳудудида тегишли лицензиялар ва крипто-провайдерлар орқали фаолиятини амалга ошириш белгиланган.
“Улар 2022-2023 йиллар давомида ҳар ой ўрнатилган тартибда ҳисобот топшириб келади. Биз эса бунинг мониторингини олиб борамиз. Натижада биз шунинг гувоҳи бўлдикки, бу соҳада амалга оширилаётган ишлар, крипто айланмалар, бундан ташқари бунга қизиқиш билдираётган фуқароларимизнинг кўпаётгани ва соҳага кириб келаётган инвестициялар оқимини инобатга олиб, биз крипто-облигациялар нархини оширишга қарор қилдик”,
дея қўшимча қилди Асқаржон Зокиров.
Шунингдек, Зокиров Ўзбекистон Республикаси ҳудудида мазкур соҳа солиққа тортилмаслиги, сабаби эса бу йўналишда бирон давлатда ҳали тўғри ишлайдиган механизм мавжуд эмаслигини очиқлади.
Аввалроқ, Ўзбекистон крипто бозор ортидан давлат даромадини икки баробар оширмоқчи эканлиги ҳақида ёзган эдик.