“Хулоса қилишга ҳали эрта” Ўзбекистон Рақобат қўмитаси BYD автомобилларини олиб киришга чеклов ҳақида муносабат билдирди
1 июлдан кейин BYD брендига тегишли автомобилларни хусусий тадбиркорлар ва бошқа норасмий дилерлар Ўзбекистонга импорт қилиши чекланиши мумкин.
Чунки BYD компаниясининг Ўзбекистондаги расмий дилери айни шу мазмунда ҳукуматга мурожаат йўллаган.
Мурожаатда электромобилларнинг маҳаллий иқлим ва йўл шароитларига мослаштирилмагани ҳамда расмий кафолатга эга бўлмагани важи билан тартибсиз импортни чеклаш сўралган.
Энг қизиғи BYDʼнинг Ўзбекистондаги расмий дилерининг асосий улушдори. Бундан келиб чиқадики электромобилларни Ўзбекистонга олиб киришни бошқа бир ишлаб чиқарувчи сўрамоқда. Бу Рақобат талабларига қай даражада мос келади?
Uzdiplomat.uz айни шу савол билан Рақобат қўмитаси раҳбариятига юзланди.
“Қарор билан мавжуд рақобат қонунчилиги ва Жаҳон савдо ташкилоти нормаларидан келиб чиқиб таклиф киритиш топшириғи берилган. Бу ҳолат бўйича ўрганиб чиқиб ўз таклифларимизни берамиз, албатта. Биз эркин бозор тарафдоримиз. Рақобат нуқтаи назаридан энг мақбул нархларда, энг мақбул сифатда истеъмолчига етказиб берилиши учун шароитлар яратиш – бизнинг асосий вазифамиз. Шу нуқтаи назардан истеъмолчилар ҳуқуқларини ҳимоя қилиш ва бозорда мақбул рақобат муҳитини яратган ҳолда мақбул нархларда, мақбул сифатда автомобиллар етказиб бериш бўйича ўзимизнинг таклифларимизни ҳукуматга тайёрлаб берамиз”, – деди Рақобат қўмитаси раиси ўринбосари Асадулла Қаюмов.
Рақобатни ривожлантириш ва истеъмолчилар ҳуқуқларини ҳимоя қилиш қўмитаси раисининг бошқа бир ўринбосари Фарруҳ Қорабоев эса ҳали чеклов ўрнатилди дейишга эрта эканини айтмоқда.
“Биринчидан, ҳали чеклов киритилмади. Киритиладими, йўқми бу таклифлардан келиб чиқиб белгиланади. Иккинчидан, биз таклифларни ишлаб чиқишда Жаҳон Савдо Ташкилотига аъзоликка таъсири бўйича баҳоланиши белгиланган. Ўзбекистоннинг ЖСТга аъзо бўлиш жараёнлари кетмоқда. Шу нуқтаи назардан ҳали чеклов киритилиши ҳақида аниқ бир фикрни айтишга ҳали эрта”, – деди Қорабоев.
Қўмита масъулларига кўра, Рақобатни ривожлантириш ва истеъмолчилар ҳуқуқларини ҳимоя қилиш қўмитасига 2023 йилда истеъмолчилардан автомобиллар савдоси билан боғлиқ 957 та мурожаат келиб тушган ва бу мурожаатлардан 754 таси – 78,7 фоизи қаноатлантирилиб, 140 тасига тушунтириш берилган. Жами 4 млрд сўмдан ортиқ маблағлар ҳисоб-китоб қилиб берилган, 60 та автомобил сифатсиз бўлгани сабабли алмаштириб беришга ҳам эришилган. Бу борадаги мурожаатларнинг асосий қисми автомобил етказиб бериш муддатлари, етказиб берилган автомобиллар нуқсонли бўлгани билан боғлиқ, деди Асадулла Қаюмов.
Ҳулкар Муртазоева