Истеъмолчилар ҳуқуқларини ҳимоя қилиш жамиятлари федерациясининг маълум қилишича, айнан импорт қилинган (иномарка) автомобиль сифати билан бевосита боғлиқ ҳолат кузатилган.
Қайд этилишича, Навоий вилояти «Навбаҳор» МФЙда яшовчи фуқаро М.Х. томонидан 370 миллион сўмга харид қилинган «KIA» русумли автомашинаси яроқсиз ҳолга келиб қолганидан шикоят қилиб, федерацияга мурожаат қилган.
Кейин, мазкур ҳолат Бухоро шаҳар жамияти мутахассислари томонидан ўрганилган. Аниқланишича, автомашинанинг яроқсиз ҳолга келишига фуқаро М.Х. томонидан «Талқон» МФЙдаги автомобилларга ёқилги қуйиш шохобчасидан қуйилган ёқилғининг сифатсизлиги сабаб бўлган.
Ушбу «KOMFORT PETROL OIL» МЧЖга қарашли автомобилларга ёқилғи қуйиш шохобчаси раҳбариятига «Истемолчиларнинг ҳуқуқларини ҳимоя қилиш тўғрисида»ги Қонуннинг тегишли бандлари жамияти мутахассислари томонидан тушунтирилиб, керакли кўрсатмалар берилган. Натижада «KIA» русумли автомобиль АЁҚШ раҳбари томонидан таъмирлаб берилган.
Истемолчилар ҳуқуқларини ҳимоя қилиш жамиятлари федерацияси агар шунга ўхшаш вазиятга дуч келинса, 1091 қисқа рақамли ишонч телефонига қўнғироқ қилишни сўрамоқда.
Ўзбекистонга сифатсиз «KIA» автомобиллари кириб келиш ҳолати кузатилганми? Агар кузатилган бўлса, бунга қандай ечим қилинди?
Uzdiplomat.uz шу каби саволлар билан «KIA»нинг Ўзбекистондаги расмий дилерининг матбуот хизмати билан боғланишга ҳаракат қилди. Ахборот линиясидан тақдим этилган матбуот хизмати манзилига йўллаган саволларга ҳозирча жавоб йўқ.