“Миллий тикланиш” Демократик Партияси раиси Алишер Қодиров мактабни тугатган, ўқишга кирганлардан ташқари барча ўғил болаларни тўловларсиз, бир йиллик мажбурий ҳарбий хизматга жалб қилишни таклиф қилди.
Унинг айтишича, тартиб ва масъулиятни мактаб ва ҳарбий хизматда ўргатмасак, қамоқхонада ҳеч қачон ўргатиб бўлмайди.
“Мактабда ўқитувчида эркинлик, ўқувчида интизом бўлиши шарт. 124 минг ўқувчи сабабсиз мактабга келмаган. 3 минг нафар ота-она МЖТКнинг 47-моддаси билан жаримага тортилган.
Бу жазо шикоят бўлмагани учун деярли қўлланмаган. Мактабни ҳам тушуниш керак-болани ўқитсинми, ота-онаси билан тортишсинми…”, деган у ўзининг Telegram саҳифасида.
У Ғарб йўқотилган авлод оила ва таълимда қадриятларни рад этиш натижаси эканини тан олаётганини эслатар экан, Ўзбекистон бу йўлдан юрмаслигага ишора қилган.
“Тарбия масаласида кескин қарорлардан қочмаслик керак.
Ўзбекистонни эркинликни ҳадсизлик деб биладиган, атлас костюм хунасалар эмас, ўз қадрини биладиган, тафаккур қиладиган ўғил-қизлар ривожлантиради.
Нафақат Ўзбекистон, балки бутун Марказий Осиёда боғча ва мактаб миллий хавфсизлик масаласига айланган. Уни нафақат Миллий гвардия, балки, бутун жамият қўриқлаши керак!”- деган у.