Икки давлат ҳукумат аъзолари ва ишбилармонлари иштирокида Тошкентда ўтган савдо иқтисодий форум самарали музокараларга бой бўлди. Хитой ишбилармонлари энг янги технологиялар, машинасозлик, текстил, замонавий ишлаб чиқариш ускуналари кабиларни таклиф этган бўлса, Ўзбекистон томонидан тақдим этилган қишлоқ хўжалиги, рангли металлар, озиқ-овқат маҳсулотлари, текстил кабилар кўпроқ қизиқтирди.
Унда сўзга чиққан Чжэцзян провинцияси ҳудудий қўмитаси бош котиби Цю Цивэнь кейинги пайтда икки мамлакат ўртасида иқтисодий соҳаларда ҳамкорлик мустаҳкамланиб бораётганини ва бугунги бизнес-форум ҳам ана шундай алоқаларни янада кенгайтиришга хизмат қилишини таъкидлади.
– Бугунги бизнес-форум икки томон учун ҳам ҳар жиҳатдан фойдали бўлади, деб ўйлайман. Чунки бу ерда ишбилармонлик алоқаларини ўрнатишда танишув ва ўзаро мулоқот катта роль ўйнайди. Кейинги йилларда Чжэцзян провинцияси иқтисодиётида катта ўсиш кузатилди. Шу билан бирга, Ўзбекистон билан тўқимачилик, электротехника, энергетика соҳаларида самарали ҳамкорлик қилинмоқда. Келгусида ушбу соҳалар каби қишлоқ хўжалиги, шамол энергетикаси йўналишларида алоқаларни янада кенгайтириш ниятимиз бор, – деди Цю Цивэнь.
Айтиш жоизки, Ўзбекистон ва Хитой ўртасида кўп қиррали алоқалар йўлга қўйилган. Кейинги йилларда иқтисодиёт, савдо, таълим, ижтимоий инфратузилма, сармоявий соҳаларда манфаатли ҳамкорлик мустаҳкамланиб бормоқда.
Чжэцзян провинцияси Халқаро савдони ривожлантириш Кенгаши вице-президенти Ин Гохуа ўз сўзида ҳудуднинг иқтисодий имкониятлари, ЯИМ ўсиши ва Ўзбекистон давлати билан ҳамкорлик алоқалари ҳақида тўхталиб ўтди.
– Хитой Ўзбекистон туризм сектори ривожи учун муҳим аҳамиятга эга, – деди Туризм қўмитаси раиси Умид Шодиев. – Бугунги кунда хитойлик сайёҳлар учун 10 кунлик визасиз режим жорий этилган. Шу билан бирга, Хитой ҳукумати томонидан 2023 йилнинг февралидан Ўзбекистон туристик гуруҳларга тавсия этилган давлатлар рўйхатига киритилган. Ҳамкорликни янада мустаҳкамлаш мақсадида йил давомида Хитойнинг ўнта ҳудудида мамлакатимиз сайёҳлик салоҳияти ҳақида тақдимотлар ва туризм соҳаси вакиллари билан учрашувлар ўтказилди. Жорий йилнинг январь ойида томонлар туризм соҳасида 2024-2026 йиллар учун ҳамкорлик дастурини имзолади. Айни пайтда бу борада ишларимизни амалга ошираяпмиз. Шу билан бирга, Хитойнинг ушбу Чжэцзян провинцияси билан яқиндан ҳамкорлик қилиш истагидамиз. Бугун икки томон ўртасида имзоланган меморандум моҳияти ҳам шунга қаратилган.
Тадбир давомида савдо алоқаларини ривожлантириш, туризм, тиббий жиҳозларни Ўзбекистонга импорти, Хитой томонига эса қишлоқ хўжалиги маҳсулотлари экспорти, Марказий Осиёдаги энг йирик саноат паркини биргаликда барпо этиш кабиларга оид қатор шартномалар имзоланди.
Шунингдек, икки мамлакат ишбилармонлари иштирокида ҳамкорликни йўлга қўйишга оид юзма-юз музокаралар олиб борилди.