Бугун 28 июнь куни Туркий давлатлар ташкилоти шафелигида Логистика марказлари ва юк ташувчилар альянси тузилди. Хўш, мазкур альянс Ўзбекистонга нима беради? Унинг аҳамияти қандай?
Uzdiplomat.uz бу саволга узоқ йиллар давомида Ўзбекистоннинг Ташқи иқтисодий алоқалар вазири ва бир муддат Транспорт вазири сифатида фаолият юритган Элёр Ғаниевдан жавоб олди.
“Ўзи ҳозир ҳам туркий давлатлар билан темир йўл мавжуд. Шунинг учун бу темир йўлларни имониятларини кўпайтириш учун логистика марказлари қуриляпти. Логистика марказларининг асосий мақсади бу темир йўллар имкониятларининг ҳажмини кенгайтириш. Шунинг учун бугунги альянсни ташкил қилиш бўйича тадбир ва таклиф жуда юқори натижаларга олиб келади”,
деди у.
Қолаверса, жорий йилнинг 19 июнь куни “Хитой-Қирғизистон-Ўзбекистон” темир йўли лойиҳасини биргаликда илгари суриш бўйича ҳукуматлараро битимни ратификация қилди. Шундан сўнг мазкур темир йўлига директор Қирғизистон томонидан тайинланди. Хўш, нега Ўзбекистон эмас? Бу қурилиш борасида Ўзбекистонга ишончсизликни англатмайдими?
Унинг айтишича, бу Ўзбекистонга нисбатан ишончсизликни англатмайди.
“Гап унда эмас. Бунинг маъноси шуки, бу темир йўл узунлигининг асосий қисми Қирғизистон ҳудудидан ўтади. Шунинг учун ҳам қурилишга раҳбарлик уларга берилди. Маъно шу”,
деди Ғаниев.
Статистика агентлигининг дастлабки маълумотларига кўра, 2024 йилнинг январь-апрель ойларида Ўзбекистон Республикаси ташқи савдо айланмасида энг юқори улушга эга бўлган ҳамкор давлат бу Хитой бўлиб, ушбу давлат билан 4 ой ичида 3,9 млрд АҚШ доллари миқдорида товар айирбошланган. Хўш, мазкур темир йўл қурилиши ушбу мамлакат билан товар айирбошлаш ҳажмини янада ошириши, Хитойнинг Ўзбекистон иқтисодиётида мустаҳкамроқ ўрнашишига сабаб бўла оладими?
“Албатта, яқин келажакда Хитой билан ташқи савдо ҳажми янада ошиб кетади. Чунки, бу Хитой бозорига чиқиш учун энг қисқа йўл. Албатта, биз жуда ижобий нарсаларга эга бўламиз”,
деди Ғаниев.
Маълумот учун, Элёр Ғаниев ҳозир 64 ёшда. У Ўзбекистон ССР, Каримов даври Ўзбекистони ҳамда Мирзиёев даври амалдори ҳисобланади.
У Ўзбекистон мустақиллиги арафасида энг муҳим вазифаларда:
1990-1992 — Ташқи иқтисодий ва савдо алоқалари давлат қўмитаси катта референти.
1992-1993 — Ўзбекистон Республикаси Ташқи иқтисодий алоқалар вазирлиги бошқарма бошлиғи.
1993-1994 — Ўзбекистон Республикаси Президенти ҳузуридаги Стратегик ва минтақалараро тадқиқотлар бўлим бошлиғи.
1994-1997 — Ўзбекистон Республикаси Ташқи иқтисодий алоқалар вазирининг ўринбосари, биринчи ўринбосари.1997-2002 — Ўзбекистон Республикаси Ташқи иқтисодий алоқалар вазири.
2002-2005 — Ўзбекистон Республикасининг Бош вазири ўринбосари — Ташқи иқтисодий алоқалар агентлиги раиси.
2005-2006 — Ўзбекистон Республикаси Бош вазирининг ўринбосари — Ташқи ишлар вазири.
2006-2009 — Ўзбекистон Республикаси Ташқи иқтисодий алоқалар, инвестициялар ва савдо вазири.
2009-2010 — Ўзбекистон Республикаси Бош вазирининг ўринбосари —Ташқи иқтисодий алоқалар, инвестициялар ва савдо вазири.
2010-2012 — Ўзбекистон Республикаси Бош вазирининг ўринбосари — Ташқи ишлар вазири.
2012 йил 13 январдан 2017 йил 28 ноябргача — Ўзбекистон Республикаси Ташқи иқтисодий алоқалар, инвестициялар ва савдо вазири.
Каримов вафотидан сўнг ҳам у ўзининг ҳукуматдаги ўрнини йўқотмади.
2005 йилдан 2018 йилгача — Ўзбекистон Волейбол федерацияси Президенти.
2017 йил 1 ноябрдан 2019 йил 28 январгача — Ўзбекистон Республикаси Президентининг Иқтисодиқ-ижтимоий масалалар бўйича давлат маслаҳатчисининг ўринбосари сифатида ишлади.
2019 йил 28 январда эса Ўзбекистон Республикаси Бош вазирининг ўринбосари — инвестициялар, ташқи иқтисодий алоқалар, инновациялар, эркин иқтисодий зоналар мажмуаси раҳбари этиб тайинланди.
2020 йил 22 январидан 8-августиггача Ўзбекистон Республикаси Транспорт вазири.
Айни шу йили у ҳукуматдаги карьерасини расман тўхтатгани маълум бўлди. Ўшанда Ғаниев ўтаётгани муносабати билан лавозимдан озод этилган эди.
Орадан ярим йил ўтганидан сўнггина Элёр Ғаниев “AG MENTORS GROUP” компаниясига асос солгани маълум бўлганди.
У ўзининг 30 йиллик меҳнат фаолияти давомида оммавий ахборот воситаларида камдан-кам кўриниш берган.