Ўндан зиёд Ҳажга борган Ўзбекистон фуқаролари ҳалок бўлган, аммо бу рақамлар яширилмоқда.
Ҳаж – 2024 зиёратида ҳалок бўлган зиёратчилар сони ҳозиргача очиқланмади. Uzdiplomat.uz нашри Ҳаж – 2024 ташкилий штаб вакиллари ва ахборот бўлимига қайта-қайта мурожаат қилишига қарамай идора бу ҳақида маълумот беришни рад этган. Ҳаж – 2024 штаби вакиллари ҳалок бўлган зиёратчилар ҳақидаги маълумотни шахсий ахборот сифатида талқин этмоқда. Шу вақтгача Тошкент шаҳар зиёратчилари орасида 4 нафар киши ҳалок бўлгани маълум. Газета.уз нашри эса ҳалок бўлганлар сони тахминан 10 нафардан зиёдлигини ёзган, аммо маълумот манбасини аниқлаштирмаган.
Бу йилги Ҳаж-2024 мавсумида Саудия Арабистонига 1 млн 830 минг зиёратчи келгани айтилади. Улар орасида 15 минг нафари ўзбекистонликлардир.
(Ҳарам масжиди тозалаш жараёнидан лавҳа)
Саудия ички ишлар вазирлиги хавфсизлик хизматининг маълум қилишича, бу йилги Ҳаж мавсумида жами 1301 нафар зиёратчи вафот этган. Уларнинг 1079 нафари Ҳаж учун расмий визасиз келган зиёратчилар ҳисобланади.