Ота-онаси вафот этгач, Қозоғистон Республикасида яшовчи амакисининг васийлигига берилган ўзбекистонлик қизлар жинсий зўравонликка учрамоқда. Бу ҳақда жорий йилнинг 6 июнь куни Болалар омбудсманига 2000 йилда туғилган А.А. (аёл) дан мурожаат келиб тушган.
Мурожаатчининг айтишича, уларнинг онаси ва отаси вафот этган. Шундан сўнг у 2006 йилда туғилган (17 ёшда) ва 2012 йилда туғилган исмли сингиллари учун энг яқин қариндош бўлсада, қизлар амакисига бериб юборилган. Аммо у қизларга уятсиз бузуқ ҳаракатлар содир этиб келган.
Шундан сўнг, аёл ўз сингилларига жинсий зўравонлик содир этаётган амакисига нисбатан қонуний чора кўришни ҳамда сингилларини Ўзбекистонга қайтариш ва энг яқин қариндош эканлиги сабабли қизларга қонуний вакил этиб тайинланишида амалий ёрдам сўраган.
“Болалар омбудсманининг ИИВга ва ТИВ орқали Ўзбекистоннинг Олмаота шаҳридаги Бош консулига юборган сўрови асосида идораларнинг тизимли ва ўзаро тезкор чоралари натижасида жорий йилнинг 8-июн куни И.А. ва С.Р. лар амакисининг уйидан полиция ва васийлик органи томонидан олиб кетилиб, мураккаб ижтимоий вазиятларга тушиб қолган болаларни қўллаб-қувватлаш Олмаота шаҳри адаптация марказига жойлаштирилди.
Ҳозирда қизларга барча зарурий ижтимоий-психологик кўмак кўрсатилмоқда”,
дейилади хабарда.
Шунингдек, Болалар омбудсмани сўровига кўра, Ўзбекистоннинг Олмаота шаҳридаги Бош консулининг тезкор ҳамкорлиги натижасида Қозоғистон полиция органлари томонидан А.А. просессуал тартибида ушланиб, унга нисбатан Қозоғистон Республикаси Жиноят кодекси 121-моддаси, 3-1 қисми, 1-банди (Жинсий характердаги зўравонлик ҳаракатлари) билан жиноят иши қўзғатилди. Кеча, 17-июн куни суд томонидан Р.Р. га нисбатан қамоқ эҳтиёт чораси қўлланилган.
“Ҳозирда ушбу жиноят ишига жабрланувчи сифатида жалб қилинган вояга етмаган И.А. ва С.Р. ларнинг қонуний манфаатларини жиноят иши юритуви давомида ҳимоя қилиш мақсадида Болалар омбудсмани ўзининг хорижий ҳамкасби – Қозоғистон Болалар омбудсмани билан қизларга зарурий ҳимоя чораларини кўрсатиш юзасидан музокара олиб бориб, ҳозирда қизларга тегишли кўмак жараёни бошланди”,
дея маълумот берган Болалар омбудсмани.
Шунингдек, Болалар омбудсмани, ИИВ ва ТИВ томонидан вояга етмаган И.А. ва С.Р. ларга нисбатан васий тайинлаш (тергов якунидан сўнг) ва уларни Ўзбекистонга қайтариш чоралари кўрилаётгани айтилган.
“Фурсатдан фойдаланиб, қардош Қозоғистон Республикаси давлат идораларига — полиция, васийлик ва ҳомийлик органлари ҳамда Болалар омбудсманига бола манфаатларини таъминлаш йўлидаги тезкор ҳамкорлиги учун миннатдорлик билдирган ҳолда биргаликдаги саъй-ҳаракатларни давом эттирамиз.
Ҳолат юзасидан қўшимча маълумот берилади”,– дея ўз хабарига якун ясаган омбудсман.