Ўзбекистон элчихонаси Россия Ташқи ишлар вазирлигига мурожаат билан чиқди.
Бу ҳақда Ўзбекистоннинг Россиядаги элчихонаси хабар берди.
Қайд этилишича, сўнгги пайтларда элчихонага ҳамюртларимиз томонидан Россияга киришда ёки Москва шаҳридаги Шереметево халқаро аэропорти орқали транзит қилишда узоқ текширувлар ва қийинчиликлар бўлаётгани ҳақида мурожаатлар кўпайган.
Юзага келган вазиятга ойдинлик киритиш мақсадида дипломатик миссия томонидан Россия Федерациясининг Ташқи ишлар вазирлигига мурожаат юборилган.
«Шунингдек, Ўзбекистон элчихонанинг консуллик бўлими Шереметево аэропортининг чегара назорати хизмати билан доимий алоқада бўлиб турибди»,
дейилади хабарда.
Маълумот учун, Россия Президенти Владимир Путин Ўзбекистонга ташрифида Ўзбекистон фуқаролари учун Россия Федерациясида муносиб меҳнат шароитларини таъминлаш учун барча имкониятларни ишга солишига ваъда қилган эди.