Ўзбекистон томони буни рад этмоқда.
Аввалроқ Bloomberg нашри Германия ҳукумати Ўзбекистон билан мамлакатдан афғон қочқинларини депортация қилиш имконини берувчи келишувни тузиш бўйича музокаралар олиб бораётгани ҳақида маълум қилган эди.
Хабарга кўра, бундай келишув Берлинга “Толибон” билан бевосита келишувлардан тийилиш имконини беради.
Май ойи охирида Германия ички ишлар вазири Нэнси Фезер бошчилигидаги Германия делегацияси ушбу масала бўйича музокаралар олиб бориш учун Тошкентга ташриф буюрган ва режага кўра, Ўзбекистон ҳукумати бошпана берилмаган ва Германиядан депортация қилинган чекланган миқдордаги афғон қочқинларини қабул қилиб, кейин Кобулга учадиган хусусий авиакомпания ёрдамида Афғонистонга жўнатиши келишилган.
Uzdiplomat.uz ушбу маълумотларга аниқлик киритиш мақсадида Ўзбекистон Ташқи ишлар вазирлиги билан боғланди. Вазирликдаги ишончли манбанинг маълум қилишича, бу хабарлар асоссиз.
“Ўзбекистон томони Германия томони билан Афғонистон фуқароларини Германиядан Ўзбекистон орқали ватанига қайтариш бўйича ҳеч қандай келишувга эга эмас”,
деди манбаа.
Шунингдек, Ўзбекистон Ички ишлар вазирлиги ҳам май ойи охирида Германия ички ишлар вазири Нэнси Фезер Тошкентга келганини рад этди. Унинг айтишича, халқаро ҳамкорлик борасидаги ҳар қандай келишувлар, учрашув ва мулоқотлар вазирлик сайтида эълон қилиб борилади.
“Германиянинг афғонларни Ўзбекистон орқали депортация қилишига алоқадор масала ҳали муҳокама қилинмаган”,
деди вазирлик Матбуот котиби Шоҳрух Ғиёсов.
Маълумот учун, Германия “Толибон” муваққат ҳукуматининг тан олинишига қарши бўлган энг йирик мамлакатлардандир. Хусусан, 2023 йилнинг ноябрь ойида Германия ички ишлар вазири Нэнси Фезер Толибон кенг кўламли инсон ҳуқуқлари бузилиши, жумладан, афғонларнинг Германияга қочишига сабаб бўлганини айтган эди.
“Толибон амалдорларига Германияда мутлақо жой йўқ”,
деган у.