Аммо бу ҳақда Ўзбекистоннинг эмас, Қозоғистоннинг Энергетика вазирлиги маълумот берди.
Ўзбекистон Жиззах вилоятидаги Тузкон кўли яқинида атом электр станциясини (Россия лойиҳаси) қуришни бошлади. Бу ҳақда Қозоғистон Энергетика вазирлигига таяниб, Orda.kz маълум қилди.
Қозоғистон Энергетика вазирлиги қурилажак АЭС Қозоғистон билан чегарадан атиги 55 км узоқликда жойлашгани, аммо радиоактив моддалар сизиб чиқмаслигига аҳолини ишонтирмоқда.
“Қурилиш жараёнида Россиянинг РИТМ-200Н реакторидан фойдаланилади. Бу қуруқликдан фойдаланиш учун денгиз технологиясининг мослашувидир. Реакторнинг иссиқлик қуввати 190 МВт, электр қуввати эса 55 МВт, хизмат муддати 60 йилгача. РИТМ-200 реакторлари Россиянинг ИЭСларида қўлланилади.
Ушбу реакторнинг хавфсизлиги аварияларнинг олдини оладиган кўп даражали ҳимоя тизимлари билан таъминланади”,
дея ёзилган хабарда.
Росатом лойиҳанинг бош пудратчиси бўлиб, унда ўзбекистонлик компаниялар ҳам иштирок этади.
“Қурилиш майдонидан 250 км узоқликдаги зонада Туркистон вилояти ва Чимкентда уч миллиондан ортиқ аҳоли истиқомат қилади”,
дейилган хабарда.
Маълумот учун, Ўзбекистон ва Россия 2017 йилдан буён АЭС лойиҳасини муҳокама қилиб келади. 2019 йилда Тузкон кўли яқинида жой танланган. Йирик атом электр станциясидан ташқари улар умумий қуввати 330 МВт бўлган кичик модулли реакторлар қуришни режалаштирмоқда.
Эслатиб ўтамиз, аввалроқ Ўзбекистон АЭС қурилишини ёзда бошлаши ҳақида маълум қилинган эди.