Чилонзорда 334 млн сўм, Сергелида 550 АҚШ доллари эвазига четга юборишни ваъда қилган фирибгарлар ушланган. Бу ҳақда Бош прокуратуранинг Иқтисодий жиноятларга қарши курашиш департаменти маълум қилди.
Хабарга кўра, Бош прокуратура ҳузуридаги Департамент Тошкент шаҳрининг Чилонзор ва Сергели туман бўлими ва ДХХ ходимлари ҳамкорлигида тезкор тадбир ўтказган.
Унда эса Тошкент шаҳрининг Чилонзор туманида яшовчи фуқаро И.А. фуқаро Ш.Ш.нинг ишончига кириб, уни танишлари ёрдамида Туркия давлати орқали айланма йўллар билан Америка Қўшма Штатларига юбориши эвазига 334 млн сўми олган вақтида қўлга олинган.
Шу каби шаҳарнинг Сергели туманида яшовчи фуқаро В.Г. фуқаро А.Ю.ни танишлари ёрдамида Польша давлатига ишга юбориши эвазига 550 АҚШ долларини олган вақтда ушланган.
«Ҳозирда мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда»,
дейилади хабарда.