Жорий йилнинг 14 январь куни “Миллий тикланиш” Демократик Партияси “ҳарбий мусиқий композициялар ва видеороликлар” танловини эълон қилган эди.
Унда иштирокчилар Ўзбекистон ҳарбий қудратини тарғиб қилувчи, ёш авлодни жасорат ва ватанпарварликка даъват этадиган 5 дақиқалик ҳарбий мусиқий композициялар ва видеороликлар тайёрлаб, масъулларга жўнатиши ва танловда иштирок этиши белгиланганди. Аммо натижалар 9 май – Хотира ва қадрлаш куни арафасида эълон қилиниши айтилган бўлса-да, мазкур танлов ғолиблари ҳали-ҳануз аниқланмаган.
Бу ҳақда Uzdiplomat.uz га танлов иштирокчиларидан бири маълум қилди.
Унинг айтишича, Партия байрам олди танлов эълон қилган-у байрам ўтгач уни унутган. Ўртада эса иштирокчилар сарсон бўлган.
“Мен биринчи марта танловда қатнашаётганим йўқ. Бундан олдин ҳам танловларда қатнашганман. Шу сабабдан ундаги низом ва қоидаларни яхши биламан. Белгиланган танловда нечта одам иштирок этган бўлса, шулар орасидан 3 таси танлаб олиниши керак. Айтайлик 50 та одамни баҳолаш учун 3,4 соат етади. 14 январда эълон қилинган танлов, 9 май кунигача тугаши керак эди. Аммо ҳали-ҳануз Партия томонидан натижалар эълон қилинмади. Сабаби нима? Ҳакамлик қилганларнинг ўзи мусиқадан билими бормикан? Уларга тайёрлаган мусиқамизнинг нимаси ёқмаган, ҳеч бўлмаса шуни айтишсин. Ёки байрам ўтди, ваъда битдими?”,
дейди Билол Дарвиш.
Вазиятга аниқлик киритиш мақсадида Uzdiplomat.uz мухбири “Миллий тикланиш” Демократик Партияси масъули билан суҳбатлашди.
Унинг айтишича, танловда ғолиб деб эълон қилиш учун муносиб номзод топилмагани сабабли ҳам партия натижаларни эълон қилолмаяпти.
“Ҳозиргача бизга етиб келган материаллар орасида талабга жавоб берадиганлари йўқ. Улар кўчирилган, айримлари телевизорда чиққан мусиқалар. Танлов иштирокчилари тайёрлаган қўшиқ ва видеороликлар ўзлари томонидан бошдан охиригача ишлаб чиқилмаган. Фақат бор нарсани ўқиб беришган. Аниқлаштирсак, «Ўзбекистон 24» каналининг материали бўлиб чиқди. Ҳатто қатнашчилар орасида Озодбек Назарбековнинг қўшиғини ўз ҳолича олиб ташлаганлар ҳам бор. Шу сабабдан бу материаллар талабга жавоб бермайди ва биз улар орасидан ғолибларни аниқлай олмаймиз”,
-деди мутахассис.
Унинг қўшимча қилишича, айнан шу сабабли ҳам партия танловни қайтадан ўтказмоқчи.
“Муддат чўзилади, чунки талабга жавоб берадиган материал йўқ. Шу сабабдан келаётган ҳафта танлов қайтадан ўтказилади. Унда қатнашган иштирокчилар яна ўзларини синаб кўрса бўлади”,
дейди у.
Маълумот учун, «Миллий Тикланиш «Демократик Партияси томонидан ўтказилаётган «ҳарбий мусиқий композициялар ва видеороликлар” танловида иштирок этиб, ғолиб бўлган қатнашчиларга қуйидаги миқдорда пул мукофотлари ажратилган:
1-ўринга 50 миллион сўм;
2-ўринга 30 миллион сўм;
3-ўринга 20 миллион сўм берилади.