Актам Ҳайитов раҳбарлигидаги Ўзбекистон фермер, деҳқон хўжаликлари ва томорқа ер эгалари кенгаши ёлғон маълумот тарқатди.
Бир муддат аввал Ўзбекистон фермер, деҳқон хўжаликлари ва томорқа ер эгалари кенгаши тарихда илк бор ғалла хирмони 9 миллион тоннадан ошгани ҳақида маълум қилди. Ўзбекистон Миллий ахборот агентлигида (ЎзА) эълон қилинган бу мақола тез фурсат ичида бошқа маҳаллий оммавий ахборот воситаларида ҳам тарқалди.
“Ғалаба ҳаммамизга муборак бўлсин!
Энг қувончлиси, ҳали далаларимизда ғалла ўрим-йиғим ишлари қизғин давом этмоқда. Қолган сувли майдонлар ҳамда лалми ва чорвачилик хўжаликлари майдонларида етиштирилган ҳосил ҳисобидан 9 млн тоннадан ортиқ улкан ғалла хирмони яратилди, уни соҳа фидоийлари қисқа муддатларда тўлиқ йиғиб олиш учун астойдил меҳнат қилмоқда”,
дейилган хабарда.
Uzdiplomat.uz мазкур хабарлар юзасидан журналист суриштирувини ўтказди.
Ўзбекистон Қишлоқ хўжалиги вазирлиги матбуот котиби Дилшод Назировнинг маълум қилишича, ҳали далаларда 3 миллион тоннадан ошиқ ҳосилни йиғишга улгурилмаган.
Ушбу рақамлар бўйича фикр юритилганда бугунги кунда айнан ўрим-терим айни авжида. Қишлоқ хўжалиги вазирлиги ҳузуридаги штабнинг энг оҳирги маълумотларига кўра, ҳозирча 7 миллион тонна ғалла йиғилган. Аммо далаларимизда яна ҳосиллармиз мавжуд. Уларни ҳам йиғиб олганимиздан сўнггина нимадир дея оламиз.
Биз ҳам яхши хабар кутяпмиз. Мўлжални 9 миллион тонна қилиб олганмиз, режамизда ундан ошиш ҳам бор. Чунки бунда об-ҳаво шароитлари ҳам ўзига хос рол ўйнайди. Бундан ташқари бу йилги меҳнат ҳам жуда самарали бўлди. Бунда ҳам маҳаллий ҳам хорижий навларни алмашлаб экиш, академик тадбирларни ўз вақтида амалга оширганлик ҳам ўзининг натижасини берди. Бу борада олимларимиз ҳам изланишларни олиб боришяпти. Яъни минтақанинг турли нуқталарида иқлим шароитларига мос ғаллаларини экиш ва улардан мўл ҳосил олиш ишлари амалга оширилмоқда”,
деди Назиров.
Унинг қўшимча қилишича, вазирлик жорий йилда ҳақиқатдан ҳам шунча ҳосил йиғишни мўлжаллаган. Аммо об-ҳаво шароитлари ва бошқа омиллар шунга тўғри келиши керак эди. Жорий мавсум эса фермерларга бирмунча ноқулайликлар туғдирган.
Ўзбекистон Статистика агентлиги ҳам 9 миллион тонна ҳосил ҳақида гапиришга ҳали эрта эканини айтмоқда.
“Статистика агентлиги бу рақамларга қўшилмайди. Биз ҳали ярим йиллик расмий рақамларни эълон қилмадик. Бу камида яна бир ойдан кейин аниқ бўлади. Фермер хўжаликлари кенгаши томонидан эълон қилинган рақам расмий статистик маълумот эмас. Бу бизнинг ишимиз. Яъни расмий статистик маълумотларни фақат Статистика агентлиги беради. Биз ҳисоботларни йиллик ва чораклик йиғиб, таҳлил қиламиз. Ҳозирда бу бўйича маълумотлар йиғилмоқда. Ярим йиллик статистик кўрсаткичлар ўз муддатида эълон қилинади”,
деди агентлик матбуот котиби Усмон Абдурасулов.
Маълумот учун, 2023 йилда Ўзбекистон ғаллакорлари 8,1 млн тоннадан зиёд дон етиштирганди.