Бугун бутун дунёда вазият издан чиқиб бормоқда. Шу сабабли ҳам ҳар бир мамлакат учун хавфсизлик масаласи замон талабига айланган. Ўзининг ҳарбий имкониятларини доим ҳам очиқлайвермайдиган, сир тутадиган Ўзбекистон эса ўз тарихи давомида илк бор ҳарбий имкониятларининг бир қисмини халққа кўрсатди.
2-4 май кунлари Тошкентдаги “Ғалаба боғи”да “Мудофаа соҳасида инновацион технологиялар фестивали” бўлиб ўтди.
Унда айтилишича, қисқа даврда Ўзбекистон барча ҳарбий завод ва корхоналарини тубдан модернизация қилинган, янгиларини барпо этган ҳамда уларни энг замонавий технология ва ускуналар билан жиҳозлаган.
Ўзбекистон ҳарбий-техник соҳада 40 дан ортиқ давлатлар билан ҳамкорлик қилади. 30 га яқин илғор хорижий компаниялар билан шартномалар тузган ва яна 38 та маҳаллий корхоналар билан ҳамкорликни йўлга қўйган. Ҳарбий завод ва корхоналарда ишлаб чиқарилаётган маҳсулотлар тури эса155 тага етказилиб, хизматлар кўрсатиш 2,5 баробарга оширилган.
Маҳаллий корхоналар бугунги кунда Ўзбекистон Қуролли Кучлари учун зирҳли машиналар, дронлар, антидронлар, оптик мосламалар, қаттиқ химояли ҳарбий кийимлар етказиб бермоқда.