Қирғизистон-Хитой-Ўзбекистон темир йўлига директор Қирғизистон томонидан тайинланди. Бу ҳақда Қирғизистон Президенти Садир Жапаров «Кагар» агентлигига берган интервьюсида маълум қилган.
Унинг сўзларига кўра, уч давлат ўртасида қўшма компания тузилган. Унинг ваколатхонаси Бишкекда жойлашган.
«Бош директор Қирғизистон томонидан тайинланган. Қолган икки давлатдан икки нафар муқобил номзодлар ҳам тайинланган. Темир йўл учун сарфланадиган барча маблағлар Бишкек орқали ўтади. Шундай қилиб, темир йўл қурилиши тугагунига қадар барча харажатлар биз ва уч давлат назоратида бўлади»,
дея қўшимча қилган Жапаров.
Маълум бўлишича, маблағларнинг 51 фоизи Хитой, 24,5 фоизи эса Қирғизистон ва Ўзбекистон томонидан киритиладиган инвестиция ҳисобига қопланади. Халқаро стандартларга кўра, сармоялар қопланганидан кейин темир йўл Қирғизистон томони назоратига ўтади.
«Бу йўл биринчи навбатда бошқаларга эмас, бизга керак. Марказий Осиё орқали Европа ва бошқа давлатлар, жумладан, Хитой ўртасида транзит йўлаги ўрнатамиз. Бу иқтисодий манфаатлар ва геосиёсий барқарорлик учун ҳам муҳим»,
дея тушунтирган у.
Маълумот учун, жорий йилнинг,19 июнь куни «Хитой-Қирғизистон-Ўзбекистон» темир йўли лойиҳасини биргаликда илгари суриш бўйича ҳукуматлараро битимни ратификация қилишни маъқуллаган. Битим 6 июнь куни Пекинда имзоланган эди.