Бу маълумотни вазир Қўнғиротбай Шарипов журналистларга берган интервьюси вақтида айтиб ўтди.
Ўзбекистонда қанча хорижлик ўқитувчи бор? Қачон Ўзбекистон талабалари бошқа хорижий давлатларнинг талабаларига ўхшаб HEMIS тизимидан ўзи хоҳлаган ўқитувчи ва фанларини танлай олиш имконига эга бўлишади?
Uzdiplomat.uz мухбири шу каби саволлар билан Олий таълим вазири Қўнғиротбой Шариповга юзланди.
Собиқ вазир Тошқулов HEMIS тизимини ўзбекчалаштирдик деган эди. Ўзбекистон талабалари қачон бошқа талабалар қатори ўқитувчиларни ва бошқа фанларни танлай олади?
Вазирнинг айтишича, HEMIS тизимининг ишлаш жараёни ҳали охиргача етмаган. Олий таълим тизимида барча нарсани рақамлаштириш керак ва бунинг биринчи босқичи HEMIS бўлди.
«HEMIS тизимини ўзбекчалаштирдик дегани балки шу маънода айтилган бўлиши мумкин. Буни чет эллик ва ўзимизнинг мутахассислар билан биргаликда ишланган. Буни алоҳида лойиҳа ишлаган. HEMIS ҳали ишлаш жараёни охиргача етмаган. Бу бизни айбимиз демаймиз. Бу доим жараёнда. Бизни олдимизда турган масала олий таълимни рақамлаштиришимиз керак. Барча хизматларни рақамлаштиришимиз керак. Бунинг биринчи босқичи HEMIS бўлган. Кредити учун биринчидан, ёшларимизни талабаларимизни билимини баҳолаб бориш учун, HEMIS тизимида уларга қўшимча қирққа яқин хизмат бор. Ўйлаймизки ҳали олдинда қиладиган ишларимиз бор»,
деди вазир.
Вазир ўзбек талабалари қачон танлов фанларни ва ўқитувчиларни танлай олади деган саволга эса бу жараёнда бир муаммо борлигини ва бу муаммо эса кафедрадаги ўқитувчилар сони ва уларнинг илмий иш билан шуғулланиши билан ҳал бўлишини айтди.
«Бугун баъзи университетларда танлов фанлари амалга оширилган. Чет элларда нима учун танлайди, кафедрада 10 ўқитувчи бўлса, шуни бештаси ўқитувчилик фаолияти билан шуғулланади, қолган бештаси илмий тадқиқот билан шуғулланади. Кейин бу илмий тадқиқот қилаётган ўқитувчилар базада тургани учун, талабаларнинг ўзлари кафедрадаги ўқитувчиларни танлаш мумкин. Бизда лекин ҳозир норматив ҳужжатлар бўйича бор ўқитувчиларни танлаш ҳуқуқига эга»,
деди Қўнғиротбой Шарипов.
Унинг айтишича, Тошкент Давлат Иқтисодиёт университетида бу жорий этилган. Ҳар йили май ойидан июнь ойигача университетда талабалар ўқитувчиларни ўзлари баҳолайди ва танлайди.
«Норматив нуқтаи назардан штатлар тўла, лекин биз қўшимча ўқитувчиларни танлаш учун улар базада бўлиши керак. У ўқитувчи қачон базада туриши мумкин? Илмий тадқиқот иши билан шуғулланиб туриши керак. Ўзини гранти бўлиши керак. Мана шунда ўқитувчини танлаш ҳуқуқига эга бўлади» ,
деди вазир.
Шунингдек, у бугунги кунда Ўзбекистондаги хорижлик ўқитувчилар сонини билмаслигини айтди.
«Ҳозирги кунда мен аниқ рақам айта олмайман. Ҳар битта университетда 10 тадан 30 гача хорижлик олимлар бор. Улар 2000 доллар атрофида маош олади»,
деди у.