Юнусободда одамларнинг “остона”сига уй қураётган тадбиркор аҳоли вакилларидан жами 3 млрдга яқин пул ундирмоқчи.
50 фоиз улуши Мурод Назаровга тегишли бўлган “INNOVATIVE SIFAT STROY” МЧЖ корхонаси Тошкент шаҳар Юнусобод тумани 8-мавзеда яшовчи 13 нафар фуқаро устидан судга даъво аризасини жўнатди.
Аризада айтилишича, аҳоли вакиллари инсофсизлик билан асоссиз талаб арз қилган ёки даъвога қарши низолашган, ёхуд ишнинг тўғри ва ўз вақтида кўриб чиқилиши ҳамда ҳал этилишига мунтазам қаршилик қилиб келган. Шунга кўра, Фуқаролик кодексининг 137-моддаси билан амалда йўқотилган вақт учун иккинчи тараф фойдасига ҳақ тўлаш мажбурияти юклатилиши мумкин.
“Бизнинг жавобгарларга нисбатан даъво аризамиз предмети айнан жавобгарларнинг даъвогарга нисбатан асоссиз равишда даво ариза киритиб судларга сарсон қилиб, қурилиш ишларини ноқонуний равишда судга бериш орқали тўхтатиб қўйганлиги, бу борада даъвогар томонидан жавобгарларни қурилиш объектида жойлашган ноқонуний қурилмаларини бузиб, ер майдонини ҳақида судга мурожаат қилишга мажбурлаганлиги, ишни ўз вақтида ва тўғри этилиши учун жавобгарлар томонидан атайин қаршилик қилиб, турли инстанцияларга асоссиз мурожаатлар натижасида қурилиш учун кетадиган вақтни йўқотганлиги ҳисобланади”,
дейилган аризада.
Гап шундаки, 2018 йилда Тошкент шаҳар Юнусобод тумани 8-даҳасида жойлашган 17, 18, 19 ва 20-сонли кўп қаватли уйларда яшовчи бир гуруҳ аҳоли ўз уйлари орасида Мурод Назаровга тегишли корхона томонидан 1,23 га ер майдонида кўп қаватли турар-жой қурилиши бошланиши бўйича Тошкент шаҳар ҳокимига мурожаат қилишади.
Тошкент шаҳар ҳокимига мазкур ҳудудда ҳеч қандай қурилиш қилмаслиги ҳақида ваъда берган Мурод Назаров кўп ўтмай ўз ваъдасини бузади ва унинг қўл остидаги бошқа корхона Юнусободдаги айнан ўша ҳудудда қурилишни давом эттиради.
Uzdiplomat.uz бир муддат аввал мазкур мавзуни ўрганиб, видеоматериал эълон қилган эди. Унда юнусободликлар ўз уйлари олдида бошқа бир кўп қаватли уй эмас болалар майдончалари ва маҳалла гузари қурилиши кераклигини айтишган.
Шунингдек, улар Назаровга тегишли корхона қурилиш ишлари давомида уй олдидаги дарахтларга зиён етаётганини ҳам маълум қилган. Таҳририятда қурилиш майдонида дарахтларга зиён етаётгани акс этган видеолавҳалар бор.
Аммо аҳоли вакилларининг судларга ва тегишли давлат органларига юборилган мурожаатлари қаноатлантирилмаган.
Бунинг устига эндиликда қурувчи корхона ўз ҳудудлари учун курашган аҳоли вакилларининг ўзини судга берди.
Жавобгарлар ҳисобидан:
- Солидар тартибда даъвогар «INNOVATIVE SIFAT STROY» МЧЖ фойдасига асоссиз талаб қўйиш натижасида етказилган моддий зарар эвазига 904.904.466 (тўққиз юз тўрт миллион тўққиз юз тўрт минг тўрт юз олтмиш олти) сўм;
- Асоссиз талаб қўйиш натижасида жамият ишчанлик обрўси, шаъни ва қадр қимматига етказилган маънавий зарар эвазига 2.000.000.000 (икки миллиард) сўм компенсация ундиришни сўрамоқда.
- Бундан ташқари, корхона ФПКнинг 136 ва 138-моддаларига асосан жавобгарлардан солидар тартибда даъвогар фойдасига суд харажатлари ва вакил харажатларини ундириш ҳақида ҳал қилувчи қарор чиқарилишини хоҳламоқда.
“Маънавий зарарнинг миқдорини белгилашда судлар жабрланувчи, юридик шахснинг унга етказилган маънавий зарарнинг оғирлигига берган субъектив баҳосини, шунингдек, даъвогарга етказилган унинг шаъни, қадр-қиммати ва ишчанлик обрўсига етказилган зарар даражасини кўрсатувчи объектив маълумотларнинг оғирлиги ва оқибати, уялтирадиган нотўғри маълумотларнинг характери ва уларни қанчалик даражада (доирада) тарқатганлиги, зарар етказувчининг ва жабрланувчининг айб даражалари, зарар етказувчи шахснинг моддий аҳволи ва бошқа эътиборга молик ҳолатларни ҳисобга олишлари лозим”,
дейилган хабарда.
Маълумот учун, аризалари апелляция инстанцияси қарори, Тошкент туманлараро маъмурий судининг 2024 йил 4 март кунги ҳал қилув қарорида ҳам қаноатлантирилмасдан қолдирилган ва ҳар сафар ўз уйлари олдида бошқа кўп қаватли уй эмас, болалар майдончалари, маҳалла гузари қад ростлашини хоҳлайдиган аҳоли вакиллари эмас, қачонлардир бу ерда қурилиш бўлмаслигини ваъда қилиб, ваъдасининг устидан чиқмаётган, Тошкент шаҳрининг собиқ ҳокими Жаҳонгир Ортиқхўжаевнинг таъбири билан айтганда “ҳақиқий тадбиркор”, “мардлик намунаси” Мурод Назаров фойдасига иш ҳал бўлиб келган.
Эслатиб ўтамиз, аввалроқ Юнусободда ниқоблилар томонидан дарахтларнинг кесиб кетилишига Мурод Назаров дахлдорми мазмунидаги видеоматериал эълон қилган эдик. Аммо тадбиркорнинг ўзи бундай тахминни рад этиб чиққан.