Аввалроқ нархлар январь ва май ойларида ҳам оширилганди. Бир йилда темирйўл билетлари қарийб 120% га ошган ва 144 минглик билет 400 мингга етган.
1 июль санасидан маҳаллий йўналишлардаги йўловчи поездлар — “Насаф”, “Шарқ”, “Ўзбекистон” поездларида чипта нархларининг тариф қисми 25 фоизга оширилади. Бу ҳақда “Ўзбекистон темир йўллари” АЖ маълум қилди.
Масалан, 12, 4-сонли “Тошкент — Қарши” йўналишининг ҳозирги чипта нархлари эконом тариф учун 150 600 сўмни, бизнес тариф учун 218 244 сўмни ташкил қилар эди. 1 июлдан кейин эса уларнинг нархи қуйидагича ўзгаради:
- ▪️ эконом — 178 250 сўм;
- ▪️ бизнес — 262 805 сўм.
“Ўзтемирйўлйўловчи” АЖ чипта нархларининг ошишини йўловчи поездларда қўшимча сервис хизматларини жорий этиш, уларни янада ривожлантириш, йўловчи вагон паркларини янгилаш, модернизация қилиш, янги электропоездларни харид қилиш, вокзалларни замон талабларига мослаштириш билан изоҳлаган.
Эслатиб ўтамиз, аввалроқ Uzdiplomat.uz бир йилда темирйўл билетлари қарийб 120% га ошган ва 144 минглик билет 400 мингга етгани ҳақида таҳлил жойлаганди.
Жорий йилнинг 20 январидан маҳаллий поездлар билетлари нархи ошиб, “Афросиёб” электропоездлари ҳамда “Шарқ”, “Насаф” ва “Ўзбекистон” тезюрар поездларининг чипталари нархи 20 фоизга кўтарилганди.
“Ўзбекистон темир йўллари” АЖ 15 майдан бошлаб яна “Афросиёб” электропоездларининг чипталар нархи эконом класс -20%, бизнес класс -30% ва ВИП класс -40%га оширган эди.
Шу тариқа йил бошидан буён нархлар учинчи марта кўтарилди.