Айрим тоифадаги чет эл фуқаролари ва фуқаролиги бўлмаган шахсларнинг Ўзбекистон Республикасида бўлишини номақбул деб топиш тартиби белгиланмоқда. Бу ҳақида Ўзбекистон Республикаси Қонунчилик Палатаси хабар берди.
Унга кўра, бир гуруҳ депутатлар томонидан “Ўзбекистон Республикасида чет эл фуқароларининг ва фуқаролиги бўлмаган шахсларнинг ҳуқуқий ҳолати тўғрисида”ги Қонунига ўзгартириш ва қўшимчалар киритиш қонун лойиҳаси ишлаб чиқилган ва қуйи палатага киритилган.
Ушбу қонунга қуйидагича ўзгартириш ва қўшимчалар киритилмоқда:
Биринчидан, чет эл фуқаролари ва фуқаролиги бўлмаган шахсларни Ўзбекистон Республикасида бўлиши номақбул деб топиш асослари ва тартиби белгиланмоқда.
Мазкур шахслар Ўзбекистон давлат суверенитетига, ҳудудий яхлит ва хавсизлигига зид бўлган давлатлараро ижтимоий, миллий, ирқий ҳамда диний адоватни келтириб чиқарувчи Ўзбекистон халқнинг шаънини, қадр-қимматини ёки тарихини таҳқирласа Ўзбекистон Республикаси ҳудудига киришга лойиқ деб топилмайди.
Иккинчидан, ушбу шахсларнинг Ўзбекистонга кириш, банклардан ҳисоб-варақалар очиш, кўчмас мулк сотиб олиш, давлат мулкини хусусийлаштиришда иштирок этиш, молиявий ва шартномавий муносабатларга киришиш тақиқланади.
Учинчидан, Ўзбекистонда вақтинча турган ёки доимий яшайдиган чет эл фуқароси ёки вақтинча турган фуқаролиги бўлмаган шахснинг мамлакатда бўлиши номақбул деб топилиши унинг Ўзбекистон ҳудудида қонуний асосларда яшаш ва мамлакатда бўлиш ҳуқуқини бекор қилишга ҳамда мазкур шахс депортация қилишга сабаб бўлади.
Тўртинчидан, қонун лойиҳасида мамлакатда бўлиши лойиқ бўлмаган шахсларни депортация қилиш асослари ва тартиби назарда тутилган.
Ўзбекистон Республикасида бўлиши мумкин эмаслиги тўғрисида Ташқи ишлар вазирлиги хабарномасини олган кундан эътиборан 10 кун ичида ихтиёрий равишда Ўзбекистондан чиқиб кетиши керак.
Агар улар белгиланган муддатда Ўзбекистон ҳудудидан ихтиёрий чиқиб кетмаса, мазкур шахслар шахс ички ишлар органлари ва бошқа ваколатли органлар томонидан депортация қилинади, яъни мажбурий тарзда чиқариб юборилади.
Ушбу қонун лойиҳаси Қозоғистон, Озарбайжон, Россия Федерацияси, Полша, Беларусь, ХХР каби давлатларнинг илғор тажрибаси ўрганилиб ишлаб чиқилган.
Эслатиб ўтамиз, аввалроқ рус тарихчиси Михаил Смолин ўзбек миллатини Ленин ўйлаб топганини, бошқа бир россиялик мансабдор Захар Прилепин эса Ўзбекистонни босиб олиш кераклигини айтган эди.