Бугунги кунга қадар Ўзбекистонда фуқаролар томонидан 3 миллиондан ортиқ рухсатномасиз уй-жой қурилган. Бу ҳақда Олий Мажлис Қонунчилик палатасининг навбатдаги мажлисида Адлия вазири ўринбосари Алишер Каримов маълум қилди.
Шу сабабли кеча, 27 февраль куни Ўзбекистонда рухсатномасиз қурилган уй-жойларнинг мулк ҳуқуқини расмийлаштириш бўйича қонун лойиҳаси кўриб чиқилди.
“2018 йилда Президентнинг тегишли фармонига мувофиқ 621 минг нафардан ортиқ фуқароларнинг рухсатномасиз қурилган уй-жойларига кадастр ҳужжатлари расмийлаштириб берилган эди. Шунга қарамасдан, бугунги кунга қадар 3 миллиондан ортиқ фуқароларнинг рухсатномасиз қурилган уй-жойларга нисбатан эгаликни белгилаш масаласи қонуний ечимини кутмоқда”, – деди Каримов.
Шунингдек, маҳаллий давлат ҳокимияти органларининг қаровсиз ўзбошимчалик билан эгалланган ер участкасида қурилган уй-жойлар, бошқа бино иншоот ёки кўчмас мулк объектларига ҳамда кичик саноат зоналари ҳудудига жойлаштирилган тадбиркорлик субъектларнинг бино ва иншоотларига нисбатан ҳуқуқни эътироф этиш тартибини белгилаш зарурлиги айтиб ўтилди.
«Қонун лойиҳаси билан ер участкаси ва унда қурилган иморатга бўлган ҳуқуқни, шунингдек якка тартибдаги уй-жой қурилган ўзбошимчалик билан эгаллаб олинган ер участкаларини ижарага бериш тартиби белгиланмоқда.
Лойиҳада ўзбошимчалик билан эгалланган ер участкаси ҳамда унда қурилган бино ва иншоотларга бўлган ҳуқуқлар эътироф этилган тақдирда, ер участкасини ўзбошимчалик билан эгаллаб олган шахслар маъмурий жавобгарликдан озод этилиши кўзда тутилмоқда», – қўшимча қилди Адлия вазирининг ўринбосари.
Депутатлар эса қонун лойиҳасининг қабул қилиниши фуқаролар ва тадбиркорлик субъектларининг ўзбошимчалик билан эгалланган ер участкаларига нисбатан ижара ҳуқуқи ҳамда уларда қурилган уй-жой бошқа бино ва иншоот объектларига нисбатан мулк ҳуқуқи расмийлаштириши учун ҳуқуқий асослар яратилишига хизмат қилишини қайб этган.
Шу тариқа мазкур қонун депутатлар томонидан биринчи ўқишда қабул қилинди.