Аввалроқ соҳага масъул вазирлик 1 миллион 300 дан кўп талаба борлигини эълон қилганди.
Тез орада олий маълумотли бўлган 300 мингдан ортиқ ўқитувчилар, 167 мингдан ортиқ муҳандис, қурувчилар, 100 мингдан ортиқ менежеру ҳуқуқшунослар меҳнат бозорига кириб келади.
Статистика агентлиги маълумот беришича, 2022/2023-ўқув йили бошига кўра, Ўзбекистонда олий таълим ташкилотларида бакалавриат йўналишида таҳсил олаётган талабалар сони 1 009 271 нафарга етган.
Талабалар сони соҳалар бўйича:
- Таълим – 317 872 нафар;
- Муҳандислик, ишлов бериш ва қурилиш соҳалари – 167 970 нафар;
- Бизнес, бошқарув ва ҳуқуқ – 113 723 нафар
- Санъат ва гуманитар фанлар – 93 513 нафар
- Ижтимоий фанлар, журналистика ва ахборот – 74 868 нафар;
- Соғлиқни сақлаш ва ижтимоий таъминот – 60 023 нафар;
- Хизматлар – 46 852 нафар;
- Қишлоқ, ўрмон, балиқчилик хўжалиги ва ветеринария – 46 556 нафар;
- Ахборот-коммуникация технологиялари – 46 066 нафар;
- Табиий фанлар, математика ва статистика – 41 828 нафарни ташкил этмоқда.
Аввалроқ, АОКАда ўтказилган брифингда Олий таълим, фан ва инновациялар вазирлиги ахборот хизмати раҳбари Назокат Абдуқундузова ҳам маълумот берган эди. Унинг қайд этишича, ОТМларнинг сони жами 213 тага етган. Шундан 116 таси давлат, 67 таси нодавлат, 30 таси эса хорижий олий таълим муассасасидир. Унинг қайд этишича, ҳозирда 213 та олийгоҳда 1 миллион 300 минг нафардан зиёд талаба таҳсил олиб, бу кўрсаткич ёшларни олий таълим билан қамраб олиш даражаси 42 фоизга ошганлигини кўрсатади.
Маълумот учун, жорий йил январь ойида Марказий банк томонидан эълон қилинган 2023 йил учун меҳнат бозори шарҳига кўра йил бошида Ўзбекистонда аҳоли сони 36,8 миллионни ташкил этмоқда. 2023 йилнинг биринчи ярми якуни бўйича иш билан банд аҳоли сони 13,9 миллион кишидан иборат. 2023 йил декабрь ойида интернет орқали эълон қилинган (Марказий банк вакансиялар сони сифатида баҳолаган) ишчи кучига бўлган талаб 49 мингдан ортиқ бўлиб, бўш иш ўринлари асосан чакана савдо (5800), ишлаб чиқариш (5,100), озиқ-овқат хизмати (4300) ва қурилиш (4,000) соҳаларида мавжуд.