Уларнинг орасида 3 та прокурор, 5 та ҳоким ёрдамчиси, 1 нафар ҳоким, 5 та солиқ инспектори, 2 та кадастр ходими ва бошқа турли мансаб эгалари бор.
Амалдорлар телефон қурилмасидан бошлаб 6 миллион долларгача пора сўраган. Мансаб эгалари асосан АҚШ долларида пора олишни афзал билишади. Қўлга олинаётганда уларга берилган бошланғич улушни ўзи 561 532,67 АҚШ долларини ташкил этган.
Uzdiplomat.uz сўнгги 6 ой ичида Ўзбекистонда пора билан қўлга тушган амалдорлар рейтингини эълон қилади.
- Самарқанд вилоятида Оқдарё туманининг собиқ ҳокими ва яна 2 шахс 11,1 гектар ерни расмийлаштириб бериш учун фуқародан 6 млн АҚШ доллари (76 млрд 438 млн) талаб қилган. Улар пулнинг 200 минг долларини олаётган вақтда ушланган.
- Бухоро вилоятида Когон тумани прокурори Баҳодир Ғуломов қидирувдаги шахсга қўлланган қамоқ эҳтиёт чорасини бекор қилиш ва жиноят иши бўйича енгиллик қилиб бериш эвазига 90 минг АҚШ доллари олаётганда ДХХ ходимлари томонидан қўлга олинган.
- Қашқадарё вилояти туманларидан биридаги “Баркамол авлод” болалар мактаби директори ўзининг юқори лавозимда ишловчи танишлари орқали, бошқа бир мактаб директори Яккабоғ туман Мактабгача ва мактаб таълими бўлими бошлиғи лавозимига тайинланишида ёрдам бериш эвазига 55 минг АҚШ доллари талаб қилиб, олдиндан 30 минг АҚШ доллари олган вақтида ушланган.
- Апрель ойида Рақобатни ривожлантириш ва истеъмолчилар ҳуқуқларини ҳимоя қилиш қўмитасининг Андижон вилояти ҳудудий бошқармасида бўлим бошлиғи ўринбосари текширувлар далолатномасини бекор қилиб бериш эвазига 22,5 минг АҚШ доллари олган вақтида қўлга олинган.
- Асака туман ҳокимлигининг қишлоқ хўжалиги бўлими бошлиғи ҳамда Кадастр агентлигининг Асака туман бўлими бошлиғи 50 сотих давлат ерининг тоифасини нотурар жойга ўзгартириб, сотиш учун харидордан 40 минг АҚШ доллари талаб қилиб, белгиланган пулнинг 20 мингини олаётган пайтда қўлга олинган.
- Тошкент шаҳрида “Ўзбекистон шаҳарсозлик бўйича лойиҳалаш илмий-тадқиқот институти” давлат муассасасининг архитектори андижонлик тадбиркордан 20 минг АҚШ доллари олган вақтида ашёвий далиллар билан ушланган.
- Андижон вилоятида Асака тумани Ички ишлар бўлими тергов бўлинмасининг собиқ ходими қурилиш фирмаси раҳбарига нисбатан қўлланилган “қамоқ” эҳтиёт чорасини ўзгартириб бериш эвазига 15 минг АҚШ доллари олаётганда қўлга тушган.
- Андижон вилояти Транспорт бошқармаси бошлиғи вазифасини вақтинча бажарувчи мансабдор тендерда ғолибликни қўлга киритиб бериш учун 7 500 АҚШ доллари олган вақтида қўлга олинган.
- “Ҳудудий электр тармоқлари” АЖ Қашқадарё филиали бош муҳандиси ўринбосари пахта-тўқимачилик кластерига тегишли бўлган 21 та сув насос қудуқларини электр тармоқларига улаш учун “техник шарт” бериш эвазига 7 минг АҚШ доллари олаётган пайтда ушланган.
- Жиззах вилоятида “Тоза ҳудуд” ДУК бош ҳисобчиси МЧЖ раҳбарига нисбатан судда кўрилаётган жиноят ишини танишлари орқали унинг фойдасига ҳал қилиб бериш, яъни озодликдан маҳрум қилиш билан боғлиқ бўлмаган жазо тайинлатиб бериш эвазига 15 минг АҚШ доллари талаб қилиб, олдиндан 5 минг АҚШ доллари олган вақтида қўлга олинган.
- Қашқадарё вилоятида Қарши тумани прокуратураси терговчиси қамоқ эҳтиёт чораси қўлламаслик эвазига МЧЖ раҳбаридан 5 минг АҚШ доллар пора олган вақтида хизмат хонасида ушланган.
- Сирдарё вилоятида Миллий Гвардиянинг Сирдарё вилоят Қўриқлаш бошқармаси хизматни ташкил этиш ва мувофиқлаштириш бўлими бош инспектори 3000 минг АҚШ доллари олган вақтда қўлга олинган.
- Қашқадарё вилоятида Кўкдала тумани ҳокимининг ўринбосари 5 минг доллар талаб қилиб, пулнинг 15 млн сўм (1200 АҚШ доллар) қисмини олган вақтида қўлга олинган.
- Мажбурий ижро бюросининг Тошкент шаҳар бошқармаси катта инспектори корхонага тегишли кўчмас мулкларни юқори баҳолаб бериш эвазига 2500 АҚШ доллари олган вақтида ДХХ ходимлари томонидан ушланган.
- Фарғона вилоятида Ёзёвон тумани ҳокимлиги қошидаги “Хўжалик ҳисобидаги уй-жойларни рўйхатга олиш, алмаштириш ва тақсимлаш” бўлими бошлиғи 2500 АҚШ доллари олган вақтида ДХХ ходимлари томонидан ушланган.
- Наманган вилоятида Мингбулоқ туман суди раиси судланувчига нисбатан енгилроқ жазо тайинлаш эвазига, унинг отасидан 2 000 АҚШ доллари олган вақтида ушланган.
- Навоий вилоятида Ўзбекистон Ҳакамлик судлари Ассоциациясининг Навоий вилояти ваколатхонаси ҳузуридаги доимий фаолият кўрсатувчи ҳакамлик суди судьяси 1000 минг АҚШ доллари олган вақтида қўлга олинган.
- Мазкур иш юзасидан терговга қадар текширув давомида ҳоким ўринбосари ўзининг қўштирноқ ичидаги холис ёрдами эвазига аввал 10 млн сўм (900 АҚШ доллари) олгани ҳам маълум бўлди.
- Қашқадарё вилояти Қарши тумани прокуратураси терговчиси айбланувчига қамоқ эҳтиёт чораси қўлламаслик эвазига 5 минг АҚШ доллари миқдорида пора талаб қилиб уни олаётган вақтда ушланган.
- Сирдарё вилояти Солиқ бошқармасининг солиқ тўловчиларга хизмат кўрсатиш бўлими бош инспектори 3 та масъулияти чекланган жамиятнинг солиқ қарзларини бартараф қилиб бериш эвазига 4 минг АҚШ доллари олган вақтида қўлга олинган.
- Наманган вилояти Янгиқўрғон тумани солиқ инспекцияси катта инспектори фермер хўжаликнинг қарздорлигини бартараф қилиб бериш эвазига 7 млн. сўм шунингдек, шу инсоннинг танишига тегишли нотурар жойнинг мол-мулк ва ер солиқларидан бартараф қилиб бериш эвазига 28 млн. сўм талаб қилади. У талаб қилинган жами 35 млн. сўм(3 минг АҚШ доллар) пул маблағини олган вақтида ушланди.
- Наманган вилояти Учқўрғон тумани бюросининг 2 нафар давлат ижрочиси МЧЖ раҳбарини алдаб, уларга ёрдам бериш эвазига 2 минг АҚШ доллари талаб қилганда қўлга олинади.
- Жиззах шаҳридаги адвокатлар ҳайъати адвокати Жиноят Кодексининг 165- ва бошқа моддалари билан айбланиб, “қамоққа олиш” тарзидаги эҳтиёт чораси қўлланилган фуқарони озодликдан маҳрум қилиш билан боғлиқ бўлмаган жазо тайинлатиб бериш эвазига 10 минг АҚШ доллари олганда ушланади.
- Фарғона вилояти Қўштепа тумани прокурори ўринбосари ўз хизмат мавқеидан фойдаланиб, мактабгача таълим ташкилоти раҳбаридан 2000 АҚШ доллари олган вақтида ашёвий далиллар билан ушланди.
- Наманган вилоятининг Чортоқ тумани ҳокимининг қишлоқ ва сув хўжалиги масалалари бўйича ўринбосари тумандаги фермерга давлат ерини олиб бериш мақсадида 2,5 минг АҚШ доллари талаб қилади. Шундан 1000 АҚШ доллари ва 5 млн.( 396,04 АҚШ доллар) сўм олган вақтида кўлга олинади.
- Тошкент вилояти Ангрен шаҳар электр таъминоти корхонаси бошлиғи ўринбосари раҳбарининг оғзаки топшириғига асосан, савдо фаолияти билан шуғулланувчи МЧЖнинг трансформаторини электр тармоғига улаб, тегишли ҳужжатларини расмийлаштириб бериш эвазига хизмат хонасида 40 млн. (3 168,32 )сўм миқдорида пора олган вақтида ашёвий далиллар билан ушланди.
- Тошкент шаҳар Давлат кадастрлар палатасининг Янгиҳаёт туман филиали бошлиғи ўз хизмат мавқеидан фойдаланиб, тумандаги 20 сотих ер майдонида қурилган уй-жой учун кадастр ҳужжатларини тайёрлаб бериш эвазига, ўзининг хизмат хонасида 25 минг АҚШ доллари миқдорида пора олган вақтида ушланди.
- Сирдарё вилоятининг Ховос тумани ҳокими ўринбосари қишлоқ хўжалиги маҳсулотлари етиштириш ва экспорт қилиш билан шуғулланувчи МЧЖга тегишли ерларни ҳокимлик захирасига олмаслик, аксинча, суғориш ишларига шароит яратиб бериш ва фаолиятига ҳеч ким аралашмаслиги эвазига 20 минг АҚШ доллари талаб қилиб, 1 минг АҚШ доллари олган вақтида кўлга олинади.
- “Ҳудудий электр тармоқлари” АЖ Тошкент вилоят филиалининг бўлим бошлиғи ва муҳандиси Қибрай туманидаги қандолатчилик маҳсулотлари ишлаб чиқарувчи корхонани 3 фазали электр тармоғига улаш ва трансформатор ўрнатиб бериш, шунингдек, бошқа техник ҳужжатларини тайёрлашда кўмаклашиш эвазига пора талаб қилиб 30 минг АҚШ долларини олган вақтида ушланди.
- Қашқадарё вилояти Қарши тумани ИИБ жиноят қидирув бўлинмаси катта тезкор ходими тадбиркорга нисбатан Жиноят процессуал кодексининг 83-моддаси 2-бандига асосан жиноят иши қўзғатишни рад этиш эвазига, 1500 АҚШ доллари миқдорида пора талаб қилади. Аввалроқ ушбу пул маблағи ҳисобидан 400 АҚШ доллари олади. Лекин, у талаб қилинган пулдан яна 400 АҚШ долларини олган вақтида ушланди.
- Сергели тумани ИИО ФМБ 2-сонли ички ишлар бўлими профилактика инспектори 5 минг АҚШ долларини пора сифатида олган вақтида ушланди.
- Қашқадарё вилояти Қарши туман солиқ инспекциясининг сайёр солиқ текширувлари шўъбаси бош инспектори маҳаллий 5 та МЧЖ фаолияти юзасидан камерал солиқ текширувлари ўтказмаслик эвазига 2300 АҚШ доллари олган вақтида ашёвий далиллар билан ушланди.
- Бухоро вилояти Ғиждувон туман солиқ инспекцияси катта инспектори якка тартибдаги тадбиркорни жорий йилнинг охирига қадар айланма солиқ тўловчиси тоифасидан, ҳар ойда 2 млн. 424 минг сўм тўлайдиган қатъий турдаги солиқ тўловчиси тоифасига ўтказмаслик, келгусида солиқ идоралари томонидан бўладиган текширувлардан ҳимоя этиш ҳамда унинг фаолиятига раҳнамолик қилиш эвазига 8 млн. сўм (633,66 АҚШ доллар)олган вақтида қўлга олинади.
- Тошкент шаҳар Яккасарой тумани солиқ инспекциясининг бош инспектори туманда жойлашган умумий овқатланиш масканида 6 ой мобайнида солиқ текширувлари ўтказмаслик, аксинча, унинг фаолиятига раҳнамолик қилиш эвазига 600 АҚШ доллари олган вақтида ушланади.
- Жиззах вилояти прокуратурасининг бўлим прокурори Жиззах шаҳрида яшовчи, 1975 й.т. фуқарони муқаддам Жиноят Кодексининг 167-моддаси билан судланганлик ҳолатини ўзининг ваколатли ҳамкасби орқали олиб ташлашни ваъда қилиб, эвазига 1000 АҚШ доллари ва 1 дона “Samsung Galaxy S24 Ultra” русумли телефон аппаратини олган вақтида қўлга тушади.
- Тошкент шаҳар Яккасарой туман ИИО ФМБ ҳузуридаги Тергов бўлими терговчиси ва 2 нафар суриштирувчиси ўзаро тил бириктириб, хизмат мавқеидан фойдаланган ҳолда, бўлим иш юритувида бўлган жиноят иши бўйича айбланувчига нисбатан “қамоққа олиш” тарзидаги эҳтиёт чорасини қўлламаслик ҳамда унинг ҳаракатларини ЖКнинг 273-моддаси 5-қисмидан 276-моддасининг 2-қисми “а” бандига қайта малакалаш эвазига, айбланувчининг таниши Қ.О. орқали 7 минг АҚШ доллари олган вақтларида ушланади.
- Наманган шаҳридаги адвокатлар ҳайъати адвокати ЖКнинг 168 ва бошқа моддалари билан қўзғатилиб, ҳозирда Наманган шаҳар судида кўриб чиқилаётган жиноят иши бўйича айбланувчига нисбатан суд органларидаги танишлари орқали озодликдан маҳрум қилиш билан боғлиқ бўлмаган жазо тайинланишига ёрдам бериш эвазига 10 минг АҚШ доллари талаб қилиб, 8 минг АҚШ доллари олган вақтида қўлга олинади.
- Қорақалпоғистон Республикаси Тахиатош тумани ҳокимининг қурилиш, коммунал хўжалик, экология ва кўкаламзорлаштириш масалалари бўйича ўринбосари фуқарога ўз хоҳишига кўра фойдаланиш (сотиш) ваколатини берувчи ҳужжатларни расмийлаштириб бериш эвазига 35 млн. сўм талаб қилади. Сўралган пул маблағидан 32 млн. сўмни(2 534,65 минг АҚШ доллари) олган вақтида ашёвий далиллар билан ушланди.
- Андижон вилояти Бўстон тумани фермер, деҳқон хўжаликлари ва томорқа ер эгалари кенгаши раиси
ўзининг номида бўлган ва чорвачиликка ихтисослашган фермер хўжалик тасарруфидаги 10 гектар ер майдонини тадбиркорга 3 йилга фойдаланишга бериш эвазига 20 минг АҚШ доллари талаб қилади. Шундан 10 минг АҚШ доллари олган вақтида ушланган. - Тошкент вилояти Фавқулодда вазиятлар вазирлигининг Бўка тумани бўлими бошлиғи фуқарога “Қурилиши тугалланган объектни фойдаланишга қабул қилиш тўғрисида давлат қабул қилиш далолатномаси”ни тасдиқлатиб бериш эвазига 2500 АҚШ доллари талаб қилади. Сўралган пулларни олган вақтида эса ашёвий далиллар билан қўлга олинади.
Маълумот учун, ушбу жиноятни содир этган амалдорларга нисбатан жиноят иши қўзғатилиб, тегишли моддалар асосида жиноий жавобгарликка тортилган.