Бош прокуратура матбуот котиби Ҳаёт Шамсутдиновнинг Uzdiplomat.uz мухбири сўровига жавоб беришича, ҳозирда тергов қилинаётган жиноят иши доирасида Туризм қўмитасидан “P.A.” МЧЖ билан ҳамкорлик қилган 39 та туризм фаолиятини амалга ошириш билан шуғулланувчиларнинг ушбу соҳада фаолият олиб боришга рухсат берувчи ҳужжатининг амал қилишини қонунда белгиланган тартибда ўз ваколати доирасида тўхтатиб туриш масаласини кўриб чиқиш сўралган.
Транспорт прокуратурасининг Туризм қўмитасига ёзган хатида «Gulbakhor Airways», «Mabrur Tur», «Ravza Tur», «Ramazon Travel», «Fayz Turizm», «Hizmat Travel», «Toyib Tur», «Ark Tur», «Zaytun Travel», «Maxbub Tour», «Muhtasham Travel», «Marjon Tur», «Ixsan Travel», «Exrom Tur», «Madinax», «Di Travel», «Risola Travel», «Maroqand», «Hiro Tur», «Najot Tour», «Labbaik Travel», «City Gloud», «Ajva», «Global Tur», «Osiyo Tur», «Brend Tur», «Qibla Travel», «Musaffo», «Ummat uchun», «Sayyor Sayohat», «Maya Tur», «Sulton Travel», «Musaffirun, «Air Fayz», «Mubin Tur», «Road Silk», «Ziyo Tur», «Makon Yunayted» ва «Mahdiy Travel» турфирмаларининг фаолиятини вақтинча тўхтатиб туришни сўралган.
Кўрсатиб ўтилган турфирмаларнинг мансабдор шахсларига нисбатан Жиноят кодексининг тегишли моддалари билан қўзғатилган жиноят иши юзасидан дастлабки тергов ҳаракатлари олиб борилаётгани хатда алоҳида қайд этилган.
«Жиноят иш ҳужжатларига кўра, Panorama Airways ва юқорида қайд этилган туризм фаолиятини амалга ошириш билан шуғулланувчи бир нечта тадбиркорлик субъектлари Умра тадбирлари учун 3 931 нафар Ўзбекистон фуқаросининг жуда кўп миқдордаги пулларини алдаш ва ишончни суиистеъмол қилиш йўли билан қўлга киритиб, уларни Саудия Арабистондан Ўзбекистонга қайтармаган», — дейилади хатда.
Ушбу хат асосида қандай чора кўрилаётгани ҳақида Туризм қўмитасига йўллаган саволимиз ҳозирча очиқ қолмоқда.
Аввалроқ, Panorama Airways авиакомпанияси мансабдор шахсларига нисбатан қўзғатилган жиноят иши доирасида бир киши қамоққа олингани ҳақида маълум қилинганди.