«Мен унақа мисолларни ҳам кўрмаганман. Агар бўлса сизлар ёзсаларингиз, буни ичига кириб ўрганишимиз мумкин”,
Адҳам Икрамов.
Мактаб ва маҳаллалардаги стадионларнинг ҳокимлар томонидан сотиб юборилаётгани ҳақида ОАВ ва ижтимоий тармоқларда бир неча бор хабарлар тарқалди. Мактабгача ва мактаб таълими вазирлиги ўз тасарруфидаги ерларни суд орқали қайтариб олиш учун ҳаракатда.
Ўзбекистон аҳолисининг 6 млн 670 минг 305 нафарини 6 ёшдан 15 ёшгача бўлган ёшлар ташкил этади. Ёшлар сонини ошиб бориши маҳалладаги, мактаблардаги спорт майдончалари ва стадионларга бўлган талабни оширади. Бу вақтда эса уларнинг сони қоғозда ортиб, амалда эса автомобиль тўхташ жойлари ёки янги бинолар қурилиши ҳисобига камайиб кетаяпти.
Маҳалла ва мактаблардаги спорт майдончалари ва стадионларнинг ҳокимлар томонидан тадбиркорларга бериб юборилаётганига Спорт вазирининг муносабати қандай эканлигини билиш мақсадида Адҳам Икромовга мурожаат қилдик.
Вазирнинг айтишича, бу Давлат активларини бошқариш агентлигига тегишли. Бундай ҳолатларга Спорт вазирлиги рози бўлмаган ва у Мактабгача ва мактаб таълим вазири Ҳилола Умарова ҳам рухсат бермаган.
“Ҳозир бу жараён жуда мураккаб. Бу биринчидан, Давлат активларини бошқариш агентлигига тегишли. У фақат бизларни ёки Халқ таълими вазирлиги рухсати билан бўлса ҳам. Биз рухсат бермаганмиз. Мен ўйлайман Ҳилола Ўктамова ҳам рухсат бермаган. У ўша агентликка ёки Кадастр агентлигига тегишли. Бу жуда мураккаб ва бу адолат билан қилинадиган нарса”,
деди Спорт вазири Адҳам Икромов.
Собиқ Савдо саноат палатаси раиси сифатида у бизнесменларни қўллаб-қувватлашни хоҳлашини айтди. Қолаверса унинг жавобидан, спорт вазирининг вазиятдан бехабар деган хулосага келиш мумкин:
“Биз болаларимизга ёки спортчиларимизга майдонлар керак ва мен унақа мисолларни ҳам кўрмаганман. Агар бўлса сизлар ёзсаларингиз, буни ичига кириб ўрганишимиз мумкин”,
деди вазир.
Умуман олганда, йил бошидан буён бир неча маротаба ОАВда бир неча маротаба бу каби ҳолатлар ҳақида хабарлар берилди. Шунчаки, интернет саҳифаларини кузатиб борадиган ҳар қандай одам бемалол бу хабарларни кўриши мумкин.
Эслатиб ўтамиз, 2024 йилнинг 20 февралигача мактаб ва маҳаллалардаги ер майдонлари ва стадионларнинг ноқонуний тортиб олиниши бўйича 208 та суд жараёнидан 148 та судда мактаб ютиб чиққан.
Мактабгача ва мактаб таълими вазирлиги вакилининг маълум қилишича мактаб ҳудудида 5 қаватли бинолар ҳам қурилган ҳолатлар аниқланган.
Аввалроқ маҳалладаги футбол майдончасини бузилиши ва унинг ўрнига 5 қаватли бинонинг қурилишига Тошкент шаҳрининг Юнус Ражабий маҳалласида яшовчи инсонларнинг бир ярим йилдан буён маҳалладаги стадионни сақлаб қолиш учун курашаётганлар ҳақида хабар берилганди.