Ўзбекистон ва Германия ўртасида экология, атроф-муҳитни муҳофаза қилиш ва иқлим ўзгаришининг салбий оқибатларига қарши курашиш бўйича стратегик ҳамкорликни кенгайтириш масалалари муҳокама қилинди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати маълум қилди.
Унга кўра, Экология вазири Азиз Абдуҳакимов ва Германия Федератив Республикасининг Ўзбекистондаги элчиси Тило Клиннер ўртасида учрашув бўлиб ўтган.
Унда Ўзбекистон ва Германия ўртасида “Яшил Марказий Осиё” ташаббуси, шишани қайта ишлаш инновацион тизимини жорий этиш бўйича инвестиция лойиҳаси, қайта ишлаш заводи қуриш каби келишувлар тузиш ҳамда, Миллий иқлим маркази билан ҳамкорликда амалга ошириладиган масалалар муҳокама қилинган.
Маълумот учун, 2022 йилда ҳам Ўзбекистон Германиянинг экология соҳасидаги тажрибасидан фойдаланиш бўйича келишув имзолаган эди.