Uzdiplomat.uz “Уни танийсизми?” лойиҳаси орқали раҳбарларнинг халққа қай даражада таниш экани ҳақида сўровнома ўтказмоқда.
Лойиҳанинг бу галги қаҳрамони Ўзбекистон туризм соҳаси “эга”си – Азиз Абдуҳакимов бўлди.
Ўзбекистоннинг бир нечта муҳим лавозимларида йиллаб ишлаб келаётган Азиз Абдуҳакимовни одамлар биладими?
Сўровномада қатнашган одамлар Азиз Абдуҳакимовни университет декани, депутат ҳамда Олий таълим вазири деб айтишди.
“Бу киши вазирликда ишласа керак, адашмасам Олий таълим вазири”,- дейди аёл.
Шунингдек, бошқа бир респондент 20 йил давомида экология бўйича илмий иш қилса ҳам Абдуҳакимовни танимаслигини билдирди.
“Бу инсонни танимас эканман. Ўзим 20 йил давомида Экология соҳасида илмий иш олиб борганман, аммо бу инсон ҳақида эшитмаганман”,- дейди сўровнома қатнашчиси.
Яна бошқа бир иштирокчи эса, Экология вазирини университет декани билан адаштирди.
“Расмдаги инсон университетимизда кўрган эдим. Факультет декани бўлса керак”, — дейди қатнашчи.
Аммо Азиз Абдуҳакимовни танийдиган ва унинг Экология вазири лавозимида ишлашини биладиганлар ҳам йўқ эмас.
“Бу инсонни танийман. Экология вазири бўлиб ишлайдилар. Олдин туризм соҳасида фаолият олиб борган, кўп яхши ишларидан таниймиз”,-дейди респондент.
Маълумот учун, Азиз Абдуҳакимов ўз меҳнат фаолиятини «Ипак йўли» банкида турли лавозимларда бошлаган.
Бир қанча давлат тузилмаларининг масъул лавозимларида фаолият юритган Абдуҳакимов алоҳида тармоқ раҳбари сифатида 2012 йилдан ишлай бошлаган. Ўша йили у Ўзбекистон Республикаси давлат мулкини бошқариш давлат қўмитаси раиси вазифасига тайинланганди. Шундан буён Абдуҳакимов вазир, ё вазир даражасига тенглаштирилган лавозимларни эгаллаб келмоқда:
2012—2014 йилларда Монополияга қарши курашиш давлат қўмитаси раиси;
2014—2017 йилларда Меҳнат ва аҳолини ижтимоий ҳимоя қилиш вазири;
2017—2018 йилларда Туризмни ривожлантириш давлат қўмитаси раиси сифатида ишлади.
Айни шу вақтдан буён у туризмга ўзгача меҳр қўйди, ва бу тармоққа қайта-қайта раҳбар сифатида тайинланиб, ўз назоратида ушлаб келади.
2018—2021 йилларда Бош вазир ўринбосари сифатида ишлаган Абдуҳакимов 2020 йилда яна Туризмни ривожлантириш давлат қўмитаси раиси бўлди.
Кейинчалик туризм спорт вазирлиги таркибига киритилганда ҳам у тармоқни бошқарган.
2021—2022 йилларда яъни бир йил давомида унинг раҳбарлигидаги тузилма бир неча бор ўзгарди ва у Туризм ва спорт вазири, Туризм ва маданий мерос вазири вазифаларини бажарди.
2023 йил 1 январдан Ўзбекистонда вазирликлар сони 25 тадан 21 тага қисқартирилганди. Хусусан, Экология ва атроф-муҳитни муҳофаза қилиш қўмитаси, Гидрометрология хизмати ҳамда Ўрмон хўжалиги давлат қўмитаси бирлаштирилиб, Табиат ресурслари вазирлиги ташкил этилди. Унга эса Азиз Абдуҳакимов раҳбар этиб тайинланди.
Орадан олти ой ўтар-ўтмай, ушбу вазирликнинг номи ўзгарди. У эса ўз жойида қолиб, Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазири бўлди. Орадан бир ой ўтмай, 2023 йилнинг июль ойида йиллар давомида Абдуҳакимов “қарамоғи”да бўлган туризм яна унинг назоратига, аниқроғи у раҳбарлик қилаётган вазирлик қошига ўтказилди.
Азиз Абдуҳакимов Экология вазири лавозимига тайинлангандан буён, дарахтларни ноқонуний кесилишини тўхтатмоқчи бўлган, аммо Ўзбекистонда ҳали ҳануз ноқонуний дарахтлар кесилишига барҳам берилмади.
Эслатиб ўтамиз, Uzdiplomat.uz да аввалроқ Бахтиёр Саидов, Алишер Қодиров, Очилбой Раматов, Шуҳрат Ғаниёв бўйича сўровнома ўтказгандик