Энди ўзбек телеканаллари хорижий блокбастерларни намойиш эта олмайдими?
АҚШ элчихонаси NETFLIX, WARNER BROTHERS, DISNEY каби компаниялар аъзо бўлган MOTION PICTURE ASSOCIATION EMEA ассоциацияси номидан Ўзбекистон Республикасига муаллифлик ҳуқуқи борасида расмий маълумот жўнатган.
Хат нусхаси Uzdiplomat.uz да бор. Унда асосан «Менинг юртим», «Ренесанс ТВ», «Севимли ТВ» ва «Зўр ТВ»га эътироз билдирилган. «Миллий ТВ» ва бошқа давлат каналлари ҳақида хатда эслатиб ўтилмаган.
«Ўзбекистонда тўғридан-тўғри эфирга узатилаётган тўртта телеканал МПА аъзоларининг рухсатисиз контентларни таклиф қилаётгани ҳақида бизда кенг далиллар бор. «Менинг юртим», «РенессансТВ», «Севимли ТВ» ва «Зўр ТВ» МПА аъзоларининг ҳуқуқларини бузмоқда.
Муаллифлик ҳуқуқи ва бошқа мулкий ҳуқуқлар, МПА аъзоларига катта зарар етказади», дейилади билдиришномада.
Буни Uzdiplomat.uzʼга Интеллектуал мулк департаменти ҳам тасдиқлади.
“Бу огоҳлантириш эмас, балки таклиф бўлиб, Ўзбекистонда фаолият юритувчи телерадиокомпанияларга АҚШдаги компаниялар томонидан сифатли, оригинал контентларни шартнома асосийда етказиб бериш назарда тутилган.
Ҳозирда Адлия вазирлиги мана шу таклифлар бўйича тегишли тартибда АҚШ элчихонаси билан ўзаро ҳамкорликда иш олиб боряпти. Шу сабабли ҳам яқинда АҚШ элчихонаси вакиллари билан ҳамкорликда давлат ва нодавлат телеканаллари учун йиғилиш ташкиллаштириш режалаштирилган. Ҳозирда бу иш жараёнда”
– дея маълумот берди Департамент бўлим бошлиғи Шарофиддин Абдумаликов.
Унинг таъкидлашича, давлат ва нодавлат телеканаллари АҚШ филмларидан бепул фойдалана олмайди.
Нафақат Ўзбекистон Республикаси қонунчилиги ва бутун жаҳонда шундай тартиб йўлга қўйилганки, ҳар бир интеллектуал мулк объектидан ўзаро шартнома тузган ҳолда, яъни унинг мулк ҳуқуқидан рухсат сўраган ҳолда фойдаланиш керак. Ҳозирги кунда хоҳ давлат, хоҳ нодавлат телерадиокомпанияларимиз томонидан Адлия вазирлиги билан ҳамкорликда шартномавий-ҳуқуқий муносабатларни йўлга қўйишда жадал ишлар амалга оширилмоқда.
Ҳозирги кунда давлат ва нодавлат телеканаллари билан биргаликда АҚШ компаниялар ўртасида шартномавий-ҳуқуқий ишлар олиб борилмоқда”,
деди Абдумаликов.
Маълум қилинишича, бунда ҳеч қайси бир давлат-нодавлат телеканалларига жазо чораларини қўллаш назарда тутилмаган.
Uzdiplomat.uz мухбири телеканаллар раҳбарлари билан боғланди, улар бу хатни олганликларини тасдиқлашди ва кўпроқ миллий киноларни намойишига эътибор қаратилаётганини айтишди. Исмини ошкор ёзишимизни истамаган хусусий каналнинг кино таҳририяти бўлими бошлиғининг айтишича, бир ойдан буён хорижий фильмларни таржима қилиш тўхтатилган.
Ҳозирда фақат ҳиндча киноларни таржима қилаяпмиз. Қозоғистон ва Туркия ижодкорларини сотиб олиш имкони бор, чунки улар арзон. NETFLIX, WORNER BROTHERS, DISNEY кабиларнинг киносини сотиб олиш каналга жуда оғирлик қилади ва оқламайди. Бу биз каби катта даромад кўролмайдиган телеканаллар учун космик нархлардир”,
деди у.