Ўзбекистонда USAID’нинг беш йилга мўлжалланган “Барча болалар муваффақиятли” дастури ишга тушди. Дастур ўзбекистонлик болалар учун 25 млн АҚШ доллари ажратади. Бу ҳақда АҚШнинг Ўзбекистондаги элчихонаси хабар берди.
Жорий йилнинг 20 февраль куни USAID’нинг “Барча болалар муваффақиятли” дастурига мўлжалланган тадбирининг очилиш маросими бўлиб ўтган. Унда эса USAID’нинг Ўзбекистондаги директори Девид Хофман, вазирлик ва идораларнинг юқори даражадаги мутасаддилари, БМТ, ногиронлиги бўлган шахслар ташкилотлари ва халқаро таълим соҳасининг экспертлари иштирок этган.
“Ушбу дастур лойиҳаси инклюзив таълим билан боғлиқ учта муҳим йўналишни қўллаб-қувватлайди: инклюзив таълим учун қулай ўқув-методик материаллар, ўқитувчилар учун амалиёт ва мактаб муҳитини яратиш, шу билан бирга асосий манфаатдор томонлар, яъни ўқитувчилар ва ногиронлиги бўлган шахслар билан биргаликда ишлаб чиқилган барқарор сиёсатни ривожлантиришга қаратилган”, – дейилади элчихона хабарида.
Маълум қилинишича, лойиҳа Creative Associates International ҳамда Халқаро таълим бўйича Америка кенгашлари, АҚШнинг Сиракуз университети қошидаги ногиронлик ва инклюзия маркази, Praxis Plus ва «Юксалиш» умуммиллий ҳаракати билан ҳамкорликда амалга оширилади.
«Тадбир сўнгида Ўзбекистондаги барча болаларни ижтимоий қўллаб-қувватлаш борасида ҳамкорликда иш олиб бориш назарда тутилган Ҳамкорлик Келишуви имзоланган.
Бу лойиҳа умумий мажбурият таълим тизимини янада инклюзив бўлишига асос солади ва ўқувчиларнинг, жумладан, ногиронлиги мавжуд ўқувчиларнинг таянч кўникмаларини ривожлантиришга кўмаклашади», – дея хабар берган АШҚ элчихонаси.