Шавкат Мирзиёев вилоят ҳокими бўлган вақтда у билан боғлиқ қандай ҳодиса содир бўлганди?
Ўзбекистон Республикаси Президентининг бугун эълон қилинган Фармони билан илк бора Ўзбекистон Республикасида хизмат кўрсатган тадбиркор» фахрий унвонини берилди.
Бу унвонга Жиззах вилояти Шароф Рашидов туманидаги «Гулчи опа томорқа хизмати» кластери раҳбари Нориева Шарофат Эргашевна лойиқ топилди.
У ҳақида 2023 йилда кун.уз нашрида «Камбағал қизнинг тақдирини ўзгартирган учрашув: тўққиз болани боқиб олган тадбиркор ҳикояси»номли материал эълон қилинганди. Унда шундай воқеани эслаб ўтилган:
1996 йил, Нориева ҳали турмуш ҳам қурмаган. Ўша вақтларда оилавий етиштирган гул кўчатларини бозорга олиб чиқиб сотган. Бир куни ҳамма ўзига тегишли маҳсулотни олиб бозордаги жойини ташлаб қочади. Бозорга вилоят раҳбари келаётган экан. Ёш Шарофат гулларини ташлаб ёки олиб қочишга улгурмайди. Айнан ўша пайтда Жиззах вилояти ҳокими бўлган Шавкат Мирзиёев унинг қаршисига келиб тўхтайди.
Вилоят ҳокими ёшгина Шарофат билан суҳбатлашади. Қизнинг оилавий бўлиб гулчилик билан шуғулланиши, шу орқали рўзғор тебратишидан хабар топади. “Қизим, сен гулларингни кўпайтир, вақти келиб бундай жойларда гул сотиб ўтирмайсан. Гулларингни ўзимиз оламиз”, дейди Мирзиёев.
Гулчи қиз бўлган воқеани ота-онасига айтиб беради. Шу тариқа улар ўзлари яшаб турган уйлардан бирининг том қисмини очиб, иссиқхона ташкил қилишади. Бир неча ойдан сўнг гуллар сотишга тайёр бўлади. Энди гулларимни ҳоким сотиб олади, деган хаёл билан ҳокимиятга боради. Аввалига уни ҳокимиятга киритишмайди. Ёш қиз дадил туриб “Менга гулларингни кўпайтир деб ҳоким айтган. Сотиб оламиз деганлари учун бу гулларни етиштирдик”, дейди. Бу шиддат ҳокимиятдагиларга яхши таъсир қилади. Ўзини ҳоким ўринбосариман деб таништирган одам гулларни сотиб олади.
“Биз шу тариқа камбағалликдан чиқдик. Ўша маблағга каттагина иссиқхона қилдик. Йилдан-йилга фаолиятимиз кенгайиб борди”, дейди Нориева.
Шарофат Нориеванинг оиласи ҳали ҳеч ким иссиқхона қуриш, томорқага замонавий ёндашув ҳақида ўйламаган йиллардаёқ бу ишга қўл уради. У гулчиликдан ташқари, паррандачилик, чорвачилик, мева-сабзавот етиштириш, умуман қишлоқ хўжалигининг деярли барча турлари билан шуғулланди. У энди камбағал эмас, аксинча, ҳар йили юзлаб кам таъминланган оилаларга иш беряпти, дейилган мақолада.
Маълумот учун, 22 август куни Президент Шавкат Мирзиёев тадбиркорлар билан очиқ мулоқотда “Ўзбекистонда хизмат кўрсатган тадбиркор” фахрий унвонини таъсис этишни таклиф қилган эди.
28 август куни эса Олий Мажлис Сенатининг эллик олтинчи ялпи мажлисида “Ўзбекистон Республикасининг “Ўзбекистон Республикасида хизмат кўрсатган тадбиркор” фахрий унвонини таъсис этиш тўғрисида”ги қонунни кўриб чиқди ва қабул қилди.