Ойига 4200 доллар маош, бепул турар жой, тиббий суғурта… Аммо ўзбекистонликлар учун эмас, хорижий ўқитувчиларга.
Иш вакансиялари бўйича Sparobanks халқаро веб сайтида виза ҳомийлиги билан Ўзбекистонда биология ўқитувчиси бўлиб ишлаш эълони жойланди. Унда талаблар унчалик оғир эмас, аммо имкониятлар анча юқори.
“Мана, энг яхши халқаро мактаблардан бирида ажойиб имконият. Улар ойига 4200 АҚШ доллари миқдорида яхши маош, бепул турар жой, авиабилет ва бошқаларни таклиф қилишади.
Иш тафсилотлари
Манзил: Ўзбекистон
Соҳа: Таълим
Йўналиш: Биология ўқитувчиси
Тажриба: камида 1 йил
Маълумоти: бакалавр даражаси, Ёш чегараси йўқ
Имтиёзлар: визани қўллаб-қувватлаш, бепул турар жой, трасплрт ҳаражатлари,
Иш тури: доимий ва тўлиқ кунлик
Маош: 4200 АҚШ доллар/ой”,
дейилган эълонда.
Талаблар сифатида эса талабгорнинг Биология фанлари бўйича бакалавр даражасини тугатган бўлиши, 5 йиллик педагогик тажриба ҳамда инглиз тилида яхши мулоқот қобилиятлари бўлиши кераклиги айтилган.
“Илгари биологиядан дарс берган бўлса, афзаллик берилади. Турли хил таълим бериш усуллари билан ишлаш тажрибаси фойдали бўлади.
Инглиз тилини яхши билиш шарт. Ўзбек ёки рус тилларини билиш мактаб тилига қараб бонус ҳисобланади.
Биологияни яхши билиш ва Ўзбекистон таълим стандартларини тушуниш муҳим. Одамлар билан яхши муносабатда бўлиш ва ўқитишни турли талабаларга мослаштириш қимматлидир.
Ўз соҳангизда янгиликлар қила олишингиз жуда қадрланади”,
дея талаб қўйилган эълонда.
Бунга таклиф сифатида эса қуйидагилар келтирилган:
Рақобатбардош иш ҳақи
Бепул турар жой
Виза ва тиббий суғурта
Тренинг дастурлари
Йилда бир маротаба таътил
Икки томонга авиачипта
Аэропортдан олиб кетиш
Шунингдек, соғлиқни сақлаш учун суғурта, бепул виза ва турли хил таътиллар ваъда қилинган.
Ўзбекистонлик ўқитувчилар хорижликларга берилаётган бундай шароит-у, имкониятларга фақат ҳавас қилишади.
Uzdiplomat.uzʼга интервью берган Малоҳат Омонова ўзбекистонлик ўқитувчиларга хорижлик ўқитувчиларга яратилган шароитнинг ўндан бири ҳам яратилмаганини айтди.
“Масалан, бизнинг маошимиз 400 доллар ҳам эмас. Мен олий тоифали ўқитувчи сифатида 3 млн 700 минг сўм маош олардим. Ҳозир туғруқ таътилидаман. Бу пул жуда оз. Ўзбекистонда биология ўқитувчилари учун дарслар жуда кам. Кўплаб соҳа устозлари иш тополмай юрибди. Улар орасида ҳам тил биладиганлари бор”,
деди у.
Унинг айтишича, агар мамлакат ўқитувчиларига ҳам шундай имконият яратилса, бугун ишсизлик муаммоси анча енгиллашган бўларди.
“Мен ҳам инглиз тилини ўрганаётган эдим. Аммо моддий қийинчилик ва ишдаги юкламалар сабаб ўрганишни ташлаб қўйдим. Бизга ҳеч қандай суғурта ҳам берилмайди”,
деди у.
Хўш, Ўзбекистон ўз ўқитувчилари учун нега бунчалик оз, хорижий мутахассислар учун эса ўзимиздагиларнинг маошидан ўн баравар кўп маош таклиф қилмоқда? Ҳатто хорижнинг энг нуфузли таълим даргоҳида ўқиган бўлсада, қайтиб келса ўзбекистонлик бўлгани учунгина кам маош олаверадими?
Бу Ўзбекистонда жаҳон стандартига жавоб берадиган ўқитувчи йўқлигини англатадими, ёки мамлакат таълим муассасалари маҳаллий ўқитувчиларнинг маҳоратига ишонмаслигиними?