Бир муддат аввал Тошкентга ташриф буюрган Россия Президенти Владимир Путин музокаралар чоғида Россияда 1 миллион ишчи ўзбеклар боригини маълум қилган эди. Шундан сўнг, Ўзбекистон Президенти матбуот котиби Шерзод Асадов Россияда ўзбекистонлик мигрантлар сони 2016 йилда 4 миллион нафар бўлгани ва бугун улар сони камайганини очиқлаган.
Ўзбекистон Ташқи ишлар вазирлиги ҳам буни тасдиқлади.
“Мамлакатимизда меҳнат мигрантларини ҳар томонлама қўллаб-қувватлаш, улар учун мамлакатимизда янги иш ўринлари яратиш, янги халқаро бозорларни очиш масаласига алоҳида эътибор қаратилмоқда. Бунинг ёрқин ифодасини Россияда меҳнат мигрантлари сони камайиб, улар учун янги имкониятлар очилгани билан изоҳлаш мумкин. Жумладан, яқинда Президент матбуот котиби Шерзод Асадов хабар берганидек, ҳозирги кунда Россия Федерациясида 1 миллион киши атрофида Ўзбекистон фуқаролари меҳнат қилмоқда. 2016 йил статистикаси билан солиштирсак, бу кўрсатгич 4 баробарга камайганини кўрамиз”,
деган вазирлик .
ТИВнинг қўшимча қилишича, айни вақтда Европа, Осиё-Тинч океани минтақаси ва Кўрфаз араб мамлакатларида меҳнат фаолияти билан шуғулланаётган ўзбекистонликлар сони ортиб бормоқда.
Эслатиб ўтамиз, аввалроқ Ўзбекистон камбағалликни қисқартириш ва бандлик вазири Беҳзод Мусаев ҳам мигрантлар мавзусига тўхталиб, йилдан-йилга мигрантларнинг кетиши эмас, қайтиши сони ортиб бораётганини айтган эди.