9 май, пайшанба куни Россияда Иккинчи жаҳон урушида қўлга киритилган ғалабанинг 79 йиллиги нишонланади. Анъанага мувофиқ эса ўша куни Қизил майдонда Ғалаба паради бўлиб ўтади. Бу ҳақда Россия Мудофаа вазири Сергей Шойгу баёнот бериб чиққан.
Унга кўра, парадда 9 мингдан ортиқ киши, 75 та ҳарбий техника ва самолётлар иштирок этади. Шунингдек, унда ҳаво паради ҳам ўтказилиши, унда Россия байроғи шаклидаги уч рангли тасвирни иккита гуруҳ ва олтита самолёт бажариши кутилмоқда.
Хўш, ҳар йили кўплаб муҳокамалар ва танқидларга сабаб бўладиган ушбу парадга Марказий Осиё президентлари борадими?
Бу парадга бориш ҳақидаги қарорини биринчилардан бўлиб қўшни Қозоғистон раҳбари эълон қилди. Мамлакатнинг Россиядаги элчиси Даурен Абаевнинг маълум қилишича, Қосим Жўмарт-Тўқаев 8-9 май кунлари Москвага ташриф буюришни режалаштирмоқда.
Унинг айтишича, 8 май куни Москвада Евроосиё иқтисодий иттифоқининг (ЕОИ) юбилей саммити бўлиб ўтади.
У 2024 йилда Қозоғистон Шанхай ҳамкорлик ташкилоти (ШҲТ) ва Коллектив хавфсизлик шартномаси ташкилотига (ОДКБ) раислик қилишини таъкидлади.
“Шундай қилиб, ушбу форматлар доирасида раҳбарларимиз ўртасида ҳам учрашувлар бўлиб ўтади”,
дея қўшимча қилган дипломат.
“Вести.кг”нинг Қирғизистон Президенти маъмурияти ташқи сиёсат бўлими бошлиғи Муратбек Азимбакиевга таяниб маълум қилишича, Садир Жапаров ҳам Ғалаба парадида иштирок этади.
Параддан бир кун олдин Жапаров Евроосиё иқтисодий иттифоқининг юбилей саммитида ҳам иштирок этади.
РИА Новости эса Тожикистон раҳбари Имомали Раҳмоннинг ҳам парадга келиш нияти борлиги ҳақида хабар берди.
Тожикистон президенти Имомали Раҳмоннинг 9 май куни Ғалаба куни муносабати билан Москвага келиши икки кун аввал маълум бўлган.
“Тожикистон президенти Имомали Раҳмон Владимир Путиннинг таклифига биноан Москвада Ғалаба кунини нишонлаш ва МДҲ давлатлари раҳбарларининг норасмий учрашувида иштирок этади”,
дея хабар берган РИА Новости манбаси.
Қайд этилишича, Раҳмон таклифномани бир кун аввал Россия раҳбари билан телефон орқали суҳбатлар чоғида олган.
Фахрий меҳмонлар қаторига Туркманистон раҳбари Сердар Бердимуҳамедов ҳам қўшилади.
“Туркманистон президенти таклифни қабул қилди, унинг эрталаб келиши кутилмоқда”,
дея ёзмоқда дипломатик манбалар.
Кремль матбуот хизмати Ўзбекистон президенти Шавкат Мирзиёев ҳам ғалабанинг 79 йиллиги муносабати билан ўтказиладиган парадга келишини маълум қилган.
Маълумот учун, Ўзбекистонда 1999 йилдан бери 9 май – Хотира ва қадрлаш куни сифатида нишонлаб келинади. Бу кунни шундай номлаш ташаббуси Ўзбекистоннинг Биринчи Президенти Ислом Каримовдан чиққан.