Унинг таркибида Ўзбекистон ҳам бор.
Ижтимоий тармоқларда “Толибон” тарғиботчилари томонидан тайёрланган, “Ислом империяси”нинг келажак харитаси тасвирланган видео тарқалди.
Видеода, 2070 йилга келиб Марказий Осиё, Ҳиндистон, Покистон, Хитой, Яқин Шарқнинг мусулмон давлатлари, Озарбайжон, Арманистон, Грузия, Африканинг баъзи давлатлари, ҳаттоки Россиянинг ҳам айрим ҳудудлари таркибида бўлган, “Ислом империяси” тасвирланган.
Журналист Билол Сарварий ўзининг Х саҳифасида Ислом империяси ҳақида ўз фикрини билдириб ўтган.
“Ҳожи Нажиб номи билан танилган, Толибон ҳукуматининг Ички ишлар вазири ўринбосари лавозимига тайинланган Мавлавий Раҳматуллоҳ минглаб жангчиларни Яқин Шарқ мамлакатларига, жумладан, Яман, Сурия, Ливан ва Фаластинга юборишни мувофиқлаштириш вазифасини бажаради. Улар бир қатор террорчи гуруҳларга кўмак кўрсатиши назарда тутилган”,-дейди Билол Сарварий.
Афғоншунос Суҳроб Бўронов “Толибон” тарғиботчиларининг ўз ҳудудидан ташқарида ҳам жанговар ҳаракатларни олиб боришга мойиллиги мавжудлиги, буни фақат вақт кўрсатиши мумкинлигини айтиб ўтди.
Эслатиб ўтамиз, аввалроқ Қозоғистон “Толибон”ни террорчилар рўйхатидан чиқаргани, Россиянинг ҳам шундай нияти борлиги ҳақида маълум қилган эдик.