27 июнь – Оммавий ахборот воситалари ходимлари куни. Хўш, журналист ким? Ўзбекистон амалдорлари уларни нимага ўхшатади? Uzdiplomat.uz ярим йил давомида турли мансаб эгаларининг журналистлар ҳақидаги фикрини ўрганди.
“Журналист – миллат ойнаси”
ИБРОҲИМ АБДУРАҲМОНОВ
Ўзбекистон Қишлоқ хўжалиги вазири Иброҳим Абдураҳмонов
“Журналист мен учун миллат ойнаси. Сабаби улар ҳамма нарсани кўрсатиб турадиган кўзгуда.
Мен яна уларни шифокорга ўхшатаман. Улар ташхис қўя олади. Шунинг учун журналистларнинг мажбурияти ҳам жуда катта бўлиб, қатъият талаб қилинади. Кўзгу бўлиш ҳам осонмас, ташхис қўйиш ҳам осонмас”.
“Журналист – холис инсон”
АКМАЛ МАҲМУДАЛИЕВ
Сирдарё вилояти ҳокими
“Ҳақиқий журналист бу бутун ижтимоий-иқтисодий, умуман олганда ҳамма нарсани ҳолисона ёритиб берадиган инсондир”.
“Журналист бу – қора фикрларни тозалайдиган “чистичка”. Аммо улар қўштирноқ ичидаги кимларгадир хизмат қилиб қўймоқда”
ОЗОДБЕК НАЗАРБЕКОВ
Ўзбекистон Маданият вазири
“Денгиз ҳайвонлари орасида бактериялардан тозалаб юрадиган “чистичка” номлиси бор. У баъзи катта балиқларга ҳам ёпишиб оладида, шуларни тозалаб юради. Шу даражада шарафли иш ўзи аслида журналистика.
Улар жамиятда урчиши мумкин бўлган қора фикрларни жамиятдан улоқтириб, ўрнига оқ фикрларни олиб кириши керак бўлган, аммо бугун бошқа вазифа билан шуғулланаётган шахслардир.
Бу менинг фикрим. Масалан, мен журналист бўлганимда шундай қилган бўлардим. Жамиятнинг онггини, ундаги “мусорлар”ни тозалаш билан шуғулланган бўлардим.
Хўш, бугун бизнинг жамиятимизда журналистлар жамоатчиликнинг фикрини қандай шакллантиряпти? Мана шу саволга салмоқли жавоб йўқ. Демак, улар ўз ўрнида туриб, жа бир ишни “қотириб қўйгани” йўқ. Эҳтимол, қўштирноқ ичидаги кимгадир билиб-билмасдан хизмат қилиб ҳам қўйяпти.
Охир-оқибат жамиятда ислоҳатларни кўрмаслик, қасддан кўрмаслик фикри шаклланяпти. Жамият эътироф этолмаяпти. Масалан мен битта ислоҳотни эътироф этмоқчи бўлсам, буёқда блогерлар “Сен “пахтакорсан” деб еворяпти. Лекин ўзи 30 йилда маҳалласига сув эндигина келган. Шуни кимдир “маҳалламга сув келди” деб айтиб чиқса, уни “еб ташлайди”. Натижада жамият эътироф эта олмаяпти, ислоҳотларни кўриб турса ҳам эътироф этишдан қўрқяпти. Бунга журналистлар сабабчи. Жамиятимиз шундай аҳволга тушиб қолганига журналистлар сабабчи”.
“Журналист – амалдорларни тебратувчи”
АЗИЗ АБДУҲАКИМОВ
Ўзбекистон Экология ва атроф-муҳитни ҳимоя қилиш, иқлим ўзгариши вазири
“Журналистика бу шундай соҳаки, жамиятни тебратувчи, давлат идораларини тебратувчи энг асосий воситачи деб айтсак бўлади. Умуман олганда, журналистлар бўлмаса, менимча ҳеч қандай ижтимоий ҳаёт ҳам бўлмасди.
Мен шахсан ҳурматли журналистларимизнинг қанақадир критик ёзган материалларини ҳам жуда синчиклаб ўқийман. Бу менга туртки бўлади. Тўғрисини айтсам, биз кўп нарсага сал ёндашишимизни ҳам ўзгартиришимиз керак. Агар ўзимиз ҳақимизда танқид чиқса, ҳаёт шу билан тугади, деб негатив фикрларга ўтиб кетмасдан ҳаракат қилишимиз керак. Нимага бу нарса чиқди, бунинг сабаби нима, нима қилиб ўзгартирсак бўлади, кимлар унга жалб этилиши керак, деган янги ҳаракат учун, янги ўзгариш учун сабаб бўлади. Шунинг учун мен учун журналистларимиз, блогерларимиз авваламбор шу республикамизда бўлаётган ўзгаришларнинг бир сабабчиларидан бири. Бу сабабчилар бўлмаганда кўп нарса қотиб қоларди. Умуман, жамиятимиз қотиб қоларди. Журналистларга катта раҳмат. Улар орқали биз жамиятни ўзгартиришга эришяпмиз”.
“Журналист – дўст”
АСИЛБЕК ХУДОЁРОВ
Ўзбекистон Соғлиқни сақлаш вазири
“Журналистлар икки тоифага бўлинади. Мен ҳурмат қиладиган тоифа жамиятдаги асосий муаммоларни кўрсатиб, унинг ечимини қидирадиган ва халқнинг дардини кўрсатиб берадиган инсонлардир.
Тиббиёт соҳасида ишлайман. Ушбу соҳадаги камчиликларни, яъни ҳаққоний камчиликларни кўрсатган журналистлар бизлар учун дўст бўлади. Биз камчиликни барибир тўғрилашимиз керак. Чунки касални яширсанг, иситмаси ошкор қилади, газак олиб кетади. Менда принцип шу. Камчиликни билишга ҳаққимиз бор. Агар камчиликни билмасак, уни ҳал қилаолмаймиз. Беморларга жони ачиб мана шуларни кўрсатиб тўғрилашга ундайдиган журналистлар бизларга фақат дўст бўлади, яқин бўлади”.
“Журналист – “хайп”чи”
ШЕРЗОД ШЕРМАТОВ
Ўзбекистон Рақамли технологиялар вазири
“Мен бир нарсадан хафа бўламан, сиз журналист ва блогерлар баъзан “хайп” қилишга, ўзбекни камситишга ҳаракат қиласизлар. Негадир ўзбекнинг обрўсини тўкишга, Ўзбекистонни ёмонлашга уринасизлар. Худо ҳайрингизни бергурлар, ўзбекларнинг ғурурланадиган даври ҳам бўлиши керакда ахир. Ўзбекнинг сал бўлса ҳам обрўсини оширишга ҳаракат қилсангизчи?!”
“Журналист – жамоатчилик назорати”
ҚЎНҒИРОТБОЙ ШАРИПОВ
Ўзбекистон Олий таълим, фан ва инновациялар вазири
“Журнатист бу жамиятнинг муаммоларини кўтариб турадиган, тараққиётни белгилаб берадиган инсонлардан бири.
Журналистлар доим очиқлик сиёсатида бўлади. Шу сабабли сизлар борсизларки, бизда ривожланиш бор. Бу журналистларни жамоатчилик назорати десак ҳам бўлади”.
“Журналист – бу спортчи”
АДҲАМ ИКРОМОВ
Ўзбекистон Спорт вазири
“Журналист ҳам оддий инсон. У баъзан шифокор инсонга айланади. Баъзан спортчи инсонга”.
“Журналист – сўз масъули”
БЕКЗОД ҲИДОЯТОВ,
Ўзбекистон Бош вазири Матбуот котиби
“Бугунги кунда журналистларимиз томонидан берилаётган ахборотлар, ҳатто муносабатлар ҳар хир ракурслаги инсонлар учун бутун мамлакат халқининг позицияси ўлароқ қабул қилинмоқда. Мен шу нарсага замин яратиш керакмас, деб ҳисоьлайман. Билан дарров бошқача, нотўғри талқин бўлади. Албатта, фикр эркинлиги, сўз эркинлиги, деган нарсалар бўор. Аммо сўз масъулияти деган нарса хам бўлиши керак”.
“Журналист яхши яшаши керак”
ШЕРЗОДХОН ҚУДРАТХЎЖА
Ўзбекистон Миллий медиа бирлашмаси бошқаруви раиси
“Журналистлар яхши яшаши керак. Улар ҳам яхши машинада юриши керак. Бадавлат журналист деган тушунчани қабул қилишимиз керак. Бизнинг онгимизда кўп йиллар буни қабул қилолмаганмиз. Мана биринчи ўзимизни яхши кўришни, ҳурмат қилишни, ўзимизни муносиб яшашни биз ўзимиз қабул қилишимиз керак. Журналистларни ҳам бойийдиган кун келибди”.
“Журналист – адолат куйчиcи”
ОТАБЕК ҲАСАНОВ
Республика Маънавия ва маърифат маркази директори
“Адолатли, ўринли, танқидий ва шаффоф маълумотларни бериб борувчи журлалистларни мен доим адолат куйчисига ўхшатаман.
Ҳа, баъзан улар ёқмайди. Уларнинг гапи сизнинг қулоғингизга ёқмайди. Аммо ақлингизга фикрлари, гаплари ёқаверади. Мен профессионал журналистларни шундай дейман.
Сиз журналистлар касбингизни асрашингиз керак. Соҳани яхши тушунмайдиганлар, бугун қўлига телефон оволиб, ўзини журналистман, деб юрадиганларданлар кўпайиб кетди. Шу сабабли ҳар бир касбнинг эгалари уни асраши керак. Нима билан? Ўзининг профессионализми билан нопрофессионал бўлганларни ажратиб қўйиши керак”.