Қирғизистон ҳукумати республика фуқароларига Ливан ва Исроилга бормасликни тавсия қилди. Бу ҳақда Қирғизистон Ташқи ишлар вазирлиги маълум қилди.
«Исроил-Ливан чегарасида вазият кескинлашгани муносабати билан вазирлик Қирғизистон Республикаси фуқароларига ушбу давлатларга саёҳат қилишдан бош тортишни тавсия қилади»,- дейилади вазирликнинг хабарида.
Бундан ташқари, Ташқи ишлар вазирлиги Исроил ва Ливандаги қирғизистонликларга «вазият барқарорлашгунча ўз хавфсизлик чораларини кучайтиришни» тавсия қилган.
Шунингдек, фавқулодда алоқалар учун Қирғизистоннинг Қувайт ва Туркиядаги элчихоналарида ишонч телефонлари мавжуд бўлиб, улар орқали Қирғизистон фуқаролари керак бўлса, ёрдам ёки маслаҳат сўрашлари мумкинлиги қўшимча килинган.