Ўзбекистон футбол ассоциацияси бугун оммавий ахборот воситаларида тарқалган маълумотлар бўйича муносабат билдирди.
Championat.asia сайти ЎФА бухгалтери 350 минг АҚШ долларни (тахминан 4 миллиард сўм) ўзлаштириб, ўтган ҳафтада Туркияга учиб кетгани ҳақида хабар берди. Қайд этилишича, унга қарши иш ҳам очилган.
Бугун тонгда тарқалган ушбу маълумот ижтимоий тармоқларда муҳокамаларга сабаб бўлди.
ЎФА ҳолат юзасидан муносабат берар экан, уни тўла инкор этмаган ҳолда ўрганишлар олиб борилаётганини қайд этган:
«ЎФА томонидан ҳолат юзасидан ўрганиш ишлари олиб борилмоқда. ОАВ вакилларидан текширилмаган ва ҳали тасдиғини топмаган маълумотларни тарқатмасликни сўраймиз. Ўрганиш ишлари юзасидан тегишли хулосалар чиқарилгач, натижаси бўйича қўшимча ахборот берилади», дейилади хабарда.
Сал аввалроқ, ушбу ҳолат юзасидан берилган саволларга Бош прокуратура ва ИИВ вакилларининг муносабатини сўраган эдик. Улар бундай маълумот мавжуд эмаслигини маълум қилишганди.