Ўзбекистонда ҳукуматни оптималлаштириш бўйича маълум стратегия мавжудми ёки вазирлар шахси, обрўсига кўра вазирликни сақлаб қолиш ёки бошқа идорага бириктириш масаласи кўриладими?
Бир нечта вазирлик ва ташкилотлар бир неча маротаба бошқа тузулмалар билан қўшилиб яна ажралиб чиқди. Давлат ташкилотлари эксперимент сифатида у ёқдан бу ёққа ўтиб қайтиб юрибди. Адлия вазирлиги янги Ўзбекистон маъмурий ислоҳотларини амалга оширишда етакчи стратеглардан бўлиши кўзда тутилган эди. Шундай экан, маълум вазирликларни бирлашиб яна қайта ажралишидаги тушунарсизликларни бу вазирлик қандай изоҳлайди?
Адлия вазири ўринбосари Алишер Каримовнинг айтишича, оптималлаштириш сиёсатига аввалига кўпчилик қарши бўлган. «Ҳеч қайси давлат органи ўзининг мустақиллигини йўқотгиси келмаганди», — дейди у.
“Кўп давлатларда 15 та, 13 та вазирлик бор экан деган фикрларни кузатамиз, лекин ўша жараёнларни ичига кириб ўрганилса, уларда вазирликлар кам бўлгани билан қуйи ташкилотлар кўп бўлади. Ҳаттоки Ўзбекистонда йўқ ташкилотлар ҳам уларда бор. Ҳар қандай давлат органининг тузилиши бу давлат органига боғлиқ бевосита ёки қандайдир вазифани амалга оширишига боғлиқ. Шунинг учун, 10 та вазирлик бор дегани, бу 10 та вазирликдан бош ҳеч қандай ташкилот йўқ, дегани эмас.
269-сон фармон қабул қилинди, лекин қабул қилингандан кейин бир йил жараён ўтгандан кейин таҳлил қилинади. Таҳлил қилингандан кейин қайсидир соҳадаги масала ўзаро бирлаштирилганда самарасини бермаётгандир. Шунинг учун шундай қарорга келинаётгандир. Адлия вазирлиги давлат бошқарувини шакллантиришдаги етакчи вазирликдан ҳисобланади. Биз ҳамиша давлат органларини оптимизация қилиш, яъни ихчамлаштириш тарафдоримиз.
Бу борада ишларимиз кўп. Ҳеч қайси давлат органи ўзининг мустақиллигини йўқотгиси келмайди. Маъмурий ислоҳотлар бўйича таклиф киритганимизда ҳам жуда катта эътирозлар бўлди, лекин амалга ошди. Алоҳида карантин агентлиги, алоҳида ветеринария қўмитаси, ўрмон хўжалиги давлат қўмитаси бор эди. Шунга ўхшаш қўмиталар жуда кўп эди, лекин мана иккитаси қишлоқ хўжалиги, биттаси Экология вазирлиги таркибига кирди. Қайсидир маънода бу ислоҳотларимиз амалга ошмоқда”, — дейди адлия вазири ўринбосари Алишер Каримов.