Қатар амири Тамим бин Ҳамад Ал Тани халқаро ҳамжамиятни Исроилнинг Ливан ва Ғазо секторига қарши тажовузини тўхтатишга даъват қилган.
У Эрон Президенти Масъуд Пезешкиян билан Дохада бўлиб ўтган матбуот анжуманида қатнашган. Бу ҳақида «Al-Jazira» га таяниб, «Anadolu» AA хабар берди.
Қайд этилишича, Амирнинг Пезешкиян билан учрашуви икки мамлакат ўртасида давом этаётган мулоқотнинг бир қисми бўлиб, унда ҳамкорлик соҳалари, хусусан савдо ва иқтисодиёт масалалари муҳокама қилинган.
«Биз Исроилнинг Ғазога, Ғарбий соҳилга қарши тажовузи ва Ливанга бўлаётган ҳужуми билан ажралиб турадиган минтақамиздаги қалтис вазиятни кўриб чиқдик», дея қўшимча қилган у.
У «(Исроил) тажовузи минтақани тубсизлик четига суриб, зўравонликни кучайтириш хавфини оширмоқда» деб огоҳлантирган. Халқаро ҳамжамиятни Исроилга Ғазо ва Ливанга шафқатсиз ҳужумларини тўхтатиш учун босим ўтказишга ундаган.
Ал Тани Қатар можарони авж олдириш ва минтақавий барқарорликни сақлаш бўйича ҳар қандай саъй-ҳаракатларни қўллаб-қувватлашини урғулаган.
Пезешкиян Дохада икки кун давомида бўлади.
Эрон президенти ташрифи мамлакатнинг Исроилга қарши бир қанча ракета ҳужумини амалга оширганидан бир неча соат кейин амалга оширилди. Тел-Авив тахминига кўра, ушбу ҳужумда 180 та ракета учирилган.
Ҳужум асосан моддий зарар келтирди. Исроил ҳаво майдонининг ёпилишига сабаб бўлди.
Эрон Исроил томонидан ҲАМАС сиёсий раҳбари Исмоил Ҳания ва «Ҳизбуллоҳ» Бош котиби Ҳасан Насруллоҳни ўлдирилгани, шунингдек Тел-Авивнинг Ғазо сектори ва Ливандаги қирғинлари учун қасос олаётганини айтган.
Ливан Соғлиқни сақлаш вазирлигининг маълум қилишича, Исроил 23 сентябрдан бери Ливанда Ҳизбуллоҳга катта ҳаво ҳужумлари уюштириб, 1000 дан ортиқ одамни ўлдирган ва 2950 дан зиёд кишини яралаган.
Халқаро ҳамжамият Исроилнинг Ливандаги ҳужумлари Ғазо можаросини янада кенгроқ минтақавий урушга айлантириши мумкинлигидан огоҳлантирмоқда.