Қозоғистон Президенти Қосим-Жомарт Тоқаев Марказий Осиё давлатларини бир-бирига қарама-қарши қўйиш, уларни бўлиб ташлашга интилаётган ташқи кучларга биргаликда қарши курашишни таклиф қилди.
Бу ҳақда у бугун, 16 май куни Қозоғистонда бўлиб ўтаётган Марказий Осиё давлатлари хавфсизлик кенгаши котибларининг биринчи йиғилиши давомида сўз очган.
У делегация раҳбарларини қутлар экан, Марказий Осиё давлатлари хавфсизлик кенгашлари котибларининг биринчи йиғилиши ташқи ва ички таҳдидлар ҳамда таҳдидларнинг олдини олиш бўйича саъй-ҳаракатларни бирлаштириш учун самарали платформага айланиши ва бу бўйича зарур чораларни ишлаб чиқишни айтиб ўтган.
![](https://uzdiplomat.uz/wp-content/uploads/2024/05/photo-2024-05-16-17-10-23.jpg)
“Ишончим комилки, биз бундай ёндашув ва уринишларни қатъиян рад этамиз, умуман олганда, мамлакатларимизда ўзаро мақбул ечим топа олмайдиган муаммолар йўқ ва бўлмаслиги ҳам керак. Ишонаманки, муштарак ҳаракатлар ва ўзаро ёрдамнинг уйғунлигигина қардош халқларимиз фаровонлигига йўл очиб беради. Фурсатдан фойдаланиб, Қозоғистондаги сув тошқинлари муносабати билан кўрсатилаётган биродарлик ҳамжиҳатлиги ва кўрсатган ёрдами учун мамлакатларингизга самимий миннатдорлик билдираман. Биз бу қўллаб-қувватлашни юксак қадрлаймиз ва буни чинакам дўстлик, яхши қўшничилик ва ўзаро қўллаб-қувватлашнинг исботи деб биламиз”,
деган Президент.
Тоқаев халқаро экстремизм ва терроризмга, наркотик моддаларнинг ноқонуний айланишига, қурол-яроғ савдосига қарши кураш ҳақида гапирар экан, бу борада Афғонистон Марказий Осиё давлатларининг умумий эътибори марказида бўлиши кераклигини қайд этган.
“Бу мамлакатда мураккаб кўп йўналишли жараёнлар содир бўлмоқда. Тан олиш керакки, Афғонистонда иқтисодий вазият барқарорлашуви ва тикланишининг маълум белгилари мавжуд. Бошқа томондан халқаро террористик ташкилотлар фаолияти билан боғлиқ юқори хавфлар сақланиб қолмоқда. Буни Москва вилоятидаги қонли теракт ҳам тасдиқлайди. Бизнинг фикримизча, ҳозирги босқичдаги стратегик вазифалардан бири Афғонистонни минтақавий алоқаларга фаол жалб этишдир. Ва бу ерда кўп нарса мамлакатларимизнинг келишилган позициясига боғлиқ. Биз мамлакатимизда БМТнинг Марказий Осиё ва Афғонистон учун Барқарор ривожланиш мақсадлари бўйича минтақавий марказини яратишни долзарб деб биламиз”,
деган Қосим-Жомарт Тоқаев.
Шунингдек, у минтақа мамлакатлари орасида савдо-иқтисодий ҳамкорлик изчил кенгаяётганини таъкидлаган. Хусусан, охирги беш йил ичида минтақалараро товар айрибошлаш ҳажми 80 фоизга ошиб, 10 млрд доллардан ортган.
“Биз “Марказий Осиё – 2040” минтақавий ҳамкорликни ривожлантириш стратегиясини ишлаб чиқдик. Минтақавий яқинлашувнинг устувор йўналишлари, биринчи навбатда, беш томонлама ҳамкорликни кенгайтириш ва Марказий Осиёнинг халқаро субъективлигини мустаҳкамлашга қаратилган”,
деди у.
Бундан ташқари, Қосим-Жомарт Тоқаев учрашув натижалари Марказий Осиё давлатлари ўртасида хавфсизлик соҳасида ҳамкорликни мустаҳкамлашга хизмат қилишига ишонч билдирган.
“Ҳамкорлик ва ўзаро ишончни ривожлантириш йўлида вазият тубдан ўзгарганини мамнуният билан қайд этамиз. Тўлиқ масъулият билан айта оламан: том маънода 10 йил аввал Марказий Осиё минтақасида бундай ҳолат йўқ эди. Ҳозир давлат раҳбарлари, ҳукумат раҳбарлари, хавфсизлик кенгашлари котиблари, ҳуқуқ-тартибот идоралари раҳбарлари у ёқда турсин, хўжалик бошқармаларига раҳбарлик қилаётган инсонлар бир-бири билан чамбарчас алоқада. Бу эса Марказий Осиё минтақасидаги вазият барқарор ривожланиш сари интилаётганидан жуда яхши далолатдир”,
деб хулоса қилган Қозоғистон Президенти ўз нутқида.
Тадбирда Қозоғистон Хавфсизлик кенгаши котиби Гизат Нурдаулетов, Қирғизистон Хавфсизлик кенгаши котиби Марат Иманқулов, Тожикистон Хавфсизлик кенгаши котиби Насрулло Махмудзода, Ўзбекистон Хавфсизлик кенгаши котиби Виктор Махмудов ва Туркманистоннинг Қозоғистондаги вакили Аннамират Ягмиров иштирок этган.
Эслатиб ўтамиз, аввалроқ Ўзбекистон Хавфсизлик Кенгаши котиби минтақага ташқи кучлар босим қилаётганини айтган эди.